ՌԴ-ի և Հայաստանի՝ դարերով ձևավորված կապերը կդիմանան բոլոր փորձություններին․ Զախարովա

ԱՄՆ-ի հայտարարություններն այն մասին, որ Հայաստանը ցանկանում է երես թեքել Ռուսաստանից, մերկապարանոց են։ ՌԴ-ի և Հայաստանի ՝ դարերով ձևավորված կապերը կդիմանան ամրության բոլոր փորձություններին, որոնց նրանց անխոնջ ենթարկում է Արևմուտքը: Այս մասին «ՌԻԱ Նովոստի»- ին ասել է ՌԴ ԱԳՆ պաշտոնական ներկայացուցիչ Մարիա Զախարովան:

«Ինչ վերաբերում է Օ'Բրայենի մերկապարանոց պնդումներին, թե Հայաստանը ցանկանում է երես թեքել Ռուսաստանից, ապա դա ամերիկացիներին բնորոշ աշխարհաքաղաքական փոփոխությունների հերթական օրինակն է՝ համաշխարհային հանրության աչքում Վաշինգտոնին անհրաժեշտ «իրականությունը» սարքելու ձգտումը, որն իրականում տեղի ունեցածի հետ ոչ մի ընդհանուր բան չունի», – ասել Է Զախարովան:

Զախարովան ընդգծել է, որ Ռուսաստանի և Հայաստանի միջև դարերով ձևավորված կապերը կդիմանան ամրության բոլոր փորձություններին, որոնց անխոնջ ենթարկում է Արևմուտքը:

«Պատմության ընթացքում մենք բազմիցս օգնության ձեռք ենք մեկնել եղբայրական հայ ժողովրդին, մտադիր ենք դա անել նաև այսուհետ», - նշել է Ռուսաստանի արտաքին քաղաքական գերատեսչության պաշտոնական ներկայացուցիչը:

Իսկ ԱՄՆ-ն, նրա խոսքով, Հարավային Կովկասում ձգտում է ստորադասել պետական կառավարման համակարգը, վերահսկել ռեսուրսային բազան և օգտագործել տարանցման ներուժը:

Հիշեցնենք՝ ավեի վաղ Եվրոպայի ու Եվրասիայի հարցերով ԱՄՆ փոխպետքարտուղար Ջեյմս Օ’Բրայենը հայտարարել է, որ Միացյալ Նահանգները պայմաններ է ստեղծում, որ Հայաստանն ավելի հեռանա Ռուսաստանից։