Բայդենը նախազգուշացրել է՝ Թրամփը պատրաստվում է կրկին վիճարկել ընտրությունների արդյունքները

ԱՄՆ նախագահ Ջո Բայդենը վստահ չէ, որ երկրում իշխանության խաղաղ փոխանցում կլինի, եթե հանրապետական Դոնալդ Թրամփը նոյեմբերին կայանալիք նախագահական ընտրություններում պարտվի դեմոկրատ թեկնածու Քամալա Հարիսին։ Որպես իր մտահոգության հիմնավորում Բայդենը մեջբերել է Թրամփի հայտարարություններն այն մասին, որ «եթե ինքը պարտվի, ապա ընտրությունները գողացված են լինելու»։ Այս մասին գրում է cnn.com-ը:

Ջո Բայդենը՝ մեջբերելով ԱՄՆ նախկին նախագահին, ասել է․ «Նա լուրջ է խոսում, բայց մենք նրան լուրջ չենք վերաբերվում... բոլոր խոսքերն այն մասին, որ «եթե մենք պարտվենք, արյունահեղություն կլինի, գողացված ընտրություններ կլինեն»»։

Դոնալդ Թրամփը մարտին նախազգուշացրել էր, որ եթե նա պարտվի 2024 թվականի ընտրություններում, դա «արյունահեղություն» կլինի ԱՄՆ-ի ավտոարդյունաբերության և երկրի համար. Բայդենը և նրա նախընտրական շտաբն արագորեն արձագանքել էին՝ պնդելով, որ նախկին նախագահը քաղաքական բռնություն է հրահրում:

Բայդենը նախազգուշացրել է, որ Թրամփը պատրաստվում է կրկին վիճարկել ընտրությունների արդյունքները նոյեմբերին, ինչպես դա արեց 2020 թվականին:

Բայդենը ընդգծել է․ «Դու չես կարող սիրել երկիրդ միայն այն ժամանակ, երբ հաղթում ես»։