ՌԴ-ից պատասխանել են ԱՄՆ-ից հնչող մեղադրանքներին

Ռուսաստանի նախագահի մամուլի քարտուղար Դմիտրի Պեսկովը մեկնաբանել է ամերիկյան ազգային հետախուզության հայտարարություններն այն մասին, որ Ռուսաստանը, Չինաստանը և Իրանը փորձում են ազդել ԱՄՆ նախագահական ընտրությունների արդյունքների վրա: Նրա խոսքով՝ Մոսկվան կտրականապես հերքում է նման մեղադրանքները։

Պեսկովի խոսքով՝ ԱՄՆ-ի կողմից Ռուսաստանի հասցեին մեղադրանքներն ընտրությունների վրա ազդելու փորձի վերաբերյալ անհեթեթ են: Նա ուշադրություն է հրավիրել այն հանգամանքի վրա, որ հանրապետականներն ու դեմոկրատները քաղաքական պայքարի ընթացքում շահագործում են ՌԴ-ի և Վլադիմիր Պուտինի գործոնները, սակայն մամուլի քարտուղարը հավելել է, որ Մոսկվայում դրան սովոր են։

Նրա խոսքով՝ նման մեղադրանքների հեղինակները հետեւում են թշնամիներ փնտրելու միտումներին։

«Իսկ ավելի լավ թշնամի, քան Ռուսաստանը, ամերիկացիները չեն կարող պատկերացնել», - ասել է Պեսկովը:

Նա նաև հիշեցրել է, որ ԱՄՆ-ում անցած ընտրություններից հետո տասնյակ միլիոնավոր դոլարներ են ծախսվել իրավապահ մարմիններում, հատուկ ծառայություններում խմբեր ստեղծելու համար՝ ռուսական միջամտության հետ կապված իրավիճակին հետևելու համար: