ՏԵՍԱՆՅՈՒԹ. Էրդողանը սպառնացել է ներխուժել Իսրայել, ինչպես դա արեց Ղարաբաղում և Լիբիայում
Թուրքիայի նախագահ Ռեջեփ Թայիփ Էրդողանը սպառնացել է ներխուժել Իսրայել՝ Պաղեստինը պաշտպանելու համար։
«Մենք պետք է շատ ուժեղ լինենք, որպեսզի Իսրայելը չկարողանա դա անել Պաղեստինի հետ։ Թուրքիան կարող է մտնել Իսրայել այնպես, ինչպես մտավ Ղարաբաղ և Լիբիա։ Մենք նույնը կանենք նրանց հետ։ Սա չանելու պատճառ չկա»,- հայտարարել է Թուրքիայի նախագահ Ռեջեփ Թայիփ Էրդողանը Ռիզե նահանգում կուսակցական ժողովի ժամանակ, հաղորդում է Haber հեռուստաալիքը։
Ի պատասխան՝ Իսրայելի արտգործնախարարը Էրդողանին համեմատել է մահապատժի ենթարկված Իրաքի առաջնորդ Սադամ Հուսեյնի հետ։
«Էրդողանը գնում է Սադամ Հուսեյնի ճանապարհով և սպառնում է հարձակվել Իսրայելի վրա։ Նա պետք է հիշի, թե ինչ կատարվեց Իրաքում և ինչպես ավարտվեց այդ ամենը»,- նրա խոսքերն է մեջբերում Times of Israel-ը։
