Նեթանյահուին խոստացել են Հիտլերի ճակատագիրը
Իսրայելի վարչապետ Բենյամին Նեթանյահուն կարող է նույն ճակատագրին արժանանալ, ինչ նացիստական առաջնորդ Ադոլֆ Հիտլերը։ Նման հայտարարությամբ է հանդես եկել Թուրքիայի ԱԳ նախարար Հաքան Ֆիդանը X (նախկին Twitter) սոցցանցի իր էջում։
«Ցեղասպան Նեթանյահուի վերջը կլինի նույնը, ինչ ցեղասպան Հիտլերի վերջը», - ընդգծել է նա՝ հավելելով, որ մարդկությունը կլինի Պաղեստինի բնակիչների կողքին:
Թուրքիայի արտաքին քաղաքական գերատեսչության ղեկավարի կարծիքով՝ Թուրքիայի նախագահ Ռեջեփ Թայիփ Էրդողանը դարձել է «մարդկության խղճի ձայնը»՝ աջակցելով պաղեստինցի ժողովրդին:
Մինչ այդ Էրդողանը հայտարարել էր, որ Թուրքիան կարող է զորք մտցնել Իսրայել։ Նրա խոսքով՝ Թուրքիան պետք է ուժեղ լինի, որպեսզի «նման քայլեր անի»։
Ի պատասխան Իսրայելի ԱԳՆ ղեկավար Իսրայել Կացը հայտնել է, որ Էրդողանն Իսրայել ներխուժելու դեպքում կարող է կրկնել մահապատժի ենթարկված Իրաքի առաջնորդ Սադդամ Հուսեյնի ճակատագիրը:
