ՏԵՍԱՆՅՈՒԹ․ Հարձակումից 23 տարի անց Երկվորյակ աշտարակների փլուզման նոր կադրեր են տարածվել

Սեպտեմբերի 11-ին Երկվորյակ աշտարակների փլուզման ժամանակ տեղի ունեցած ահաբեկչության նոր կադրեր են հայտնվել համացանցում։

Ճապոնացի լուսանկարիչ Քեյ Սուգիմոտոն YouTube-ում հրապարակել է 2001 թվականի սեպտեմբերի 11-ին ԱՄՆ-ում Համաշխարհային առեւտրի կենտրոնի աշտարակների կործանման տեսանյութը, որը նկարահանվել է պրոֆեսիոնալ տեսախցիկով:

«Սրանք այն կադրերն են, որոնք ես նկարահանել եմ 2001 թվականի սեպտեմբերի 11-ին Համաշխարհային առևտրի կենտրոնի փլուզման ժամանակ։ Նկարահանվել Է Նյու Յորքի Սենթ Մարքս Փլեյս փողոցի 64 տան տանիքից Sony VX2000 տեսախցիկով՝ հեռակոնվերտերով», - գրել է նա։

Տղամարդը խնդրել է տեսանյութն օգտագործել միայն «պատմական արխիվային նպատակներով»։

Կադրերում մանրամասն երեւում է, թե ինչպես են աշտարակների տանիքներից սեւ ծխի քուլաներ բարձրանում, իսկ հետո երկու շենքերն էլ փլվում են։

2001 թվականի սեպտեմբերի 11-ի առավոտյան «Ալ Քաիդա» իսլամիստական խմբավորման 19 զինյալներ գրավեցին չորս ուղևորատար ինքնաթիռ: Երկու Ինքնաթիռ ահաբեկիչներն ուղղել են Երկվորյակ աշտարակների վրա, որոնք գտնվում են Նյու Յորքի Մանհեթենի հարավային մասում: Եվս մեկը մխրճվել Է Պենտագոնի շենքի մեջ, չորրորդ ինքնաթիռն ընկել է Փենսիլվանիայում։

Բացի 19 գրոհայիններից, հարձակումների հետևանքով զոհվել է 2977 մարդ, ևս 24-ը անհետ կորել են: Զոհվածների մեծ մասը խաղաղ բնակիչներ էին։ Ահաբեկչությունը զոհերի թվով պատմության մեջ ամենախոշորն է դարձել։