Հայաստանին ռազմական օգնություն ուղարկելու ԵՄ որոշումը՝ Ֆրանսիայի կողմից նույն երկիրը «Բաստիոն» բազմաֆունկցիոնալ զրահատեխնիկայով և «Կեսար» ինքնագնաց հրետանային համակարգերով զինելու քայլերից հետո, շատ սխալ և վտանգավոր քայլ է և ծառայում է տարածաշրջանում լարվածության սրմանը։ Եվրամիության նման գործողություններն ակնհայտորեն միակողմանի և կողմնակալ են և տարածաշրջանում «բաժանարար գծեր» ստեղծելու քաղաքականության դրսևորում են։ Այս մասին հայտարարել է Ադրբեջանի ԱԳՆ մամուլի քարտուղար Այհան Հաջիզադեն՝ պատասխանելով ԶԼՄ-ների հարցին:

«Հիշատակված ռազմական օգնությունը և ապագայում նման օգնության ավելացման կոչերը կծառայեն Հայաստանի ռազմական ներուժի ամրապնդմանը, որը 30 տարի օկուպացրել է Ադրբեջանի հանրապետության տարածքի մի մասը և ներկայումս չի հրաժարվում մեր տարածքային ամբողջականության դեմ ոտնձգություններից, ինչպես նաև տարածաշրջանում նրա ապակառուցողական գործունեությունից։

Մեր կատեգորիկ բողոքն ենք հայտնում Եվրամիության խորհրդի այս որոշման դեմ և ակնկալում ենք օգնության մասին թափանցիկ տեղեկատվության տրամադրում։

Եվրոպական Միությունը պետք է վերջ դնի տարածաշրջանում սպառազինման և ռազմականացման քաղաքականությանը նպաստող նման քայլերին և հասկանա, որ տարածաշրջանում խաղաղությանն ու համագործակցությանը այլընտրանք չկա: Հակառակ դեպքում Եվրամիությունը կկիսվի Հայաստանի կողմից կայունության խախտմանն ուղղված ցանկացած հնարավոր սադրանքի պատասխանատվությունը»,-նշել են երկրի ԱԳՆ-ից։