Windows-ի խափանումն ազդել է շուրջ 8,5 մլն սարքի վրա

Տեղեկատվական տեխնոլոգիաների համաշխարհային խափանումը, որը կապված էր CrowdStrike կիբերանվտանգության ընկերության աշխատանքի հետ, ազդել է Windows օպերացիոն համակարգով աշխատող սարքերի մոտ 1%-ի, ասել է Microsoft-ը: Ընկերության հաշվարկներով՝ խոսքը մոտ 8,5 միլիոն սարքի մասին է։

«Չնայած տոկոսը փոքր էր, սոցիալական և տնտեսական զգալի ազդեցությունը ցույց է տալիս, որ CrowdStrike կիբերանվտանգության ծրագրերը օգտագործվում են կարևոր ծառայություններ մատուցող կազմակերպությունների կողմից», - ասվում է Microsoft-ի բլոգում:

Ամերիկյան կորպորացիան նշել է, որ միջադեպն ուղղակիորեն չի առնչվում Microsoft-ի աշխատանքին, քանի որ խնդիրն առաջացել է ծրագրային ապահովման թարմացման պատճառով։ Այնուամենայնիվ, կորպորացիան աշխատել է լուծել խնդիրը, քանի որ այն ազդել է իր համակարգի վրա:

Հիշեցնենք, որ հուլիսի 19-ին, աշխարհի բազմաթիվ ընկերություններ լուրջ խնդիրներ ունեցան Windows-ի պատճառով: Խափանումը հանգեցրեց հազարավոր չվերթների հետաձգման ամբողջ աշխարհում, խնդիրներ առաջացան ֆոնդային բորսաներում, բանկերում, հիվանդանոցներում և հեռուստաալիքներում: