«ՀՀ-ն օկուպացիոն պետություն է»․ Ադրբեջանի ԱԳՆ-ն մեղադրում է Մակրոնին
Ադրբեջանի ԱԳՆ-ն Ֆրանսիայի նախագահ Էմանուել Մակրոնին մեղադրել է Երևանի և Բաքվի միջև խաղաղության գործընթացը խափանելու փորձերի մեջ։
«Ցավոք, եվրոպական քաղաքական հանրության գագաթնաժողովում Ֆրանսիայի նախագահ Էմանուել Մակրոնի տեսակետները, որոնք արդարացնում են Հայաստանի ռազմականացման քաղաքականությունը և բացահայտ կանխակալ դիրքորոշում են ցուցաբերում Ադրբեջանի նկատմամբ, տարածաշրջանում լարվածություն ստեղծելու և խաղաղ գործընթացը խոչընդոտելու Ֆրանսիայի փորձերի ևս մեկ վառ օրինակ են»,- այս մասին հայտարարել է Ադրբեջանի ԱԳՆ մամուլի քարտուղար Այհան Հաջիզադեն:
«Ադրբեջանի ցանկացած ջանք, այդ թվում՝ նրա ռազմական ներուժի ուժեղացումն ուղղված է արդար նպատակի իրագործմանը։ Սակայն նույնը չի կարելի ասել Հայաստանի մասին, որն օկուպացիոն պետություն է։ Ֆրանսիայի կողմից Հայաստանին որպես խաղաղասեր երկիր ներկայացնելը, որը 30 տարի օկուպացիայի տակ է պահել ադրբեջանական տարածքները, մեկ միլիոն ադրբեջանցիների վտարել հայրենի հողերից, կատարել զանգվածային սպանություններ և մարդկության դեմ հանցագործություններ, ցույց է տալիս, թե որքան անարդար է այդ երկրի քաղաքականությունը ինչպես միջնորդության շրջանում, այնպես էլ 44-օրյա Հայրենական պատերազմից հետո:
Ցանկանում ենք նաև հիշեցնել, որ հենց Ֆրանսիայի նման պետությունների քաղաքականությունը, որը չի նպաստել հակամարտության խաղաղ կարգավորմանը, թույլ չի տվել Հայաստանին վերջ դնել ադրբեջանական տարածքների օկուպացիային, գրեթե 30 տարի շարունակ կոծկել է Հայաստանի ագրեսիան։ Հաշվի առնելով ասվածը՝ մենք ևս մեկ անգամ հայտարարում ենք, որ Ֆրանսիայի ջանքերը, որոնք չեն ծառայում խաղաղությանը և խաթարում են տարածաշրջանում ապակայունացումը, որևէ արդյունք չեն տա»,- նշվում է երկրի ԱԳՆ հայտարարության մեջ։
