Կրակոցներից հետո «Նա հաղթեց ընտրությունները». հանրապետականները` Թրամփի մասին

Նոյեմբերին կայանալիք նախագահական ընտրություններում հանրապետական Դոնալդ Թրամփի հաղթելու շանսերը, նրա դեմ մահափորձից հետո, մեծացել են. այս կարծիքին են Հանրապետական կուսակցության ներկայացուցիչները, որոնք զրուցել են Politico թերթի հետ:

«Նախագահ Թրամփը վերապրեց այս հարձակումը և հենց նոր հաղթեց ընտրություններում», - ասել է կոնգրեսական Դերիկ Վան Օրդենը:

Հանրապետականների մի մասը կարծում է, որ կատարվածը կամրապնդի նախկին նախագահին ընտրողների աջակցությունը, և նոյեմբերի ընտրություններում դա կտա իր արդյունքը:

Կոնգրեսական Թիմ Բուրշեթը հավելել է, որ մահափորձից հետո համացանցում արագորեն տարածված լուսանկարները և տեսանյութերը, որոնցում Թրամփը բռունցքը վեր է պարզել և ներկաներին կոչ է անում պայքարել, ևս կնպաստեն նրա վարկանիշի բարձրացմանը:

Միևնույն ժամանակ Politico-ն գրում է, որ Կոնգրեսի որոշ հանրապետականներ, օրինակ՝ Մայք Քոլինսը, տարածել են դավադրապաշտական անհիմն տեսություններ առ այն, որ ԱՄՆ նախագահ Ջո Բայդենն է «կարգադրել» կրակել:

Ինչ վերաբերում է վերջին շրջանում Թրամփին ակտիվ քննադատող դեմոկրատներին, ապա նրանք կատարվածից հետո դադարեցրել են նախկին նախագահի դեմ իրենց բանավոր հարձակումները: Իսկ հանրապետականները շտապել են Թրամփի վրա հարձակման պատճառ նշել հակառակ կողմի հռետորաբանությունը:

Ավելի վաղ նշել էինք, որ ԱՄՆ Փենսիլվանիա նահանգում աջակիցների հետ հանրահավաքի ժամանակ նախագահի հանրապետական թեկնածու Դոնալդ Թրամփի դեմ մահափորձ է իրականացվել:

Հնչել են կրակոցներ, որից հետո նա ընկել է. Գաղտնի ծառայության աշխատկիցները մարմիններով ծածկել են նախկին նախագահին: Մահափորձից հետո Թրամփը տեղափոխվել է հիվանդանոց, նրա կյանքին վտանգ չի սպառնում:

Ըստ ՀԴԲ-ի՝ կրակողը՝ 20-ամյա Թոմաս Մեթյու Քրուքսը, չեզոքացվել է: Նրա քայլի դրդապատճառն առայժմ անհայտ է: Իրավապահ մարմինները միջադեպի հետաքննություն են սկսել:

ԱՄՆ նախագահ Ջո Բայդենը դատապարտել է Թրամփի դեմ մահափորձը:

«Ուրախ եմ լսել, որ նա ապահով է և իրեն լավ է զգում: Ես աղոթում եմ նրա և նրա ընտանիքի համար։ Ջիլը և ես երախտապարտ ենք Գաղտնի ծառայությանը նրան փրկելու համար: Ամերիկայում նման բռնության համար տեղ չկա։ Մեր ազգը պետք է միավորվի սա դատապարտելու համար»,- իր ուղերձում ասել է Բայդենը։