Մենք այն ազգն ենք, որն ամենից շատ է տուժում մեր հարևանի հակամարտությունից․ Էրդողան
Թուրքիայի նախագահ Ռեջեփ Թայիփ Էրդողանը Newsweek պարբերականին տված գրավոր հարցազրույցում մեղադրել է ԱՄՆ-ին Սիրիայում ահաբեկիչներին աջակցելու մեջ:
«Մենք այն ազգն ենք, որն ամենից շատ է տուժում մեր հարևան Սիրիայի հակամարտությունից։ ԱՄՆ-ն աջակցում է ոչ թե Սիրիայի քրդերին, այլ ահաբեկիչներին։ Հենց մենք ենք աջակցում Սիրիայի քրդերին և պաշտպանում նրանց իրավունքները։ PKK/PYD/YPG ահաբեկչական կազմակերպությունը (Քրդստանի աշխատավորական կուսակցություն, Թուրքիայում արգելված է որպես ահաբեկչական կազմակերպություն – խմբ.) տարածաշրջանում ահաբեկչական գործունեություն է ծավալում SDF-ի քողի տակ։ Այն հատկապես հետապնդում է Սիրիայի քրդերին։ Հենց այդ ահաբեկիչներն են, որոնց աջակցում է ԱՄՆ -ն, սպառնում քրդերին, արաբներին և թուրքմեններին տարածաշրջանում և վտարում նրանց իրենց հողերից», - ասել է Թուրքիայի առաջնորդը։
Նրա խոսքով՝ բոլոր հակամարտությունների լուծումը Սիրիայում նոր սոցիալական միավորումն է՝ տարածքային ամբողջականության հիման վրա:
«Մենք ցանկանում ենք, որ Սիրիան լինի ոչ թե մի երկիր, որտեղ տարածաշրջանային և համաշխարհային տերությունները զինված պայքար են մղում, այլ բարգավաճող պետություն, որը լիովին զերծ է ահաբեկչությունից և կառավարվում է սիրիացիների կողմից», - ասել է Թուրքիայի նախագահը:
«Սիրիական ժողովրդավարական ուժերի» (SDF) կազմավորումները, որոնց հիմքը կազմում են քրդական ինքնապաշտպանական ջոկատները YPG-ն, ամերիկյան զինվորականների աջակցությամբ վերահսկում են սիրիական Էլ Հասեկե եւ Ռաքքա նահանգների մեծ մասը, ինչպես նաեւ Հալեպի եւ Դեր Զորի Նահանգների որոշ բնակավայրեր: Մասնավորապես, նրանց վերահսկողության տակ են գտնվում Էլ Հասեկե և Կամիշլի քաղաքների թաղամասերի մեծ մասը։
Պաշտոնական Դամասկոսը չի ճանաչում Սիրիայի հյուսիս-արևելքում ինքնավար վարչակազմին:
