Մակրոնի ծրագիրը ձախողվել է․ ինչ է հայտնի․ ԶԼՄ

Էմանուել Մակրոնի՝ Ուկրաինա հրահանգիչներ ուղարկելու ծրագիրը հարցականի տակ հայտնվեց այն բանից հետո, երբ Ֆրանսիայի նախագահը ձախողվեց խորհրդարանական ընտրություններում, ինչպես նաև չունեցավ դաշնակիցների լայն աջակցություն: Այս մասին Bloomberg-ին տված հարցազրույցում հայտարարել է Ուկրաինայում զինվորականների տեղակայման առաջարկով Մակրոնի գլխավոր աջակիցը՝ Լիտվայի նախագահ Գիտանաս Նաուսեդան։

Նրա խոսքով՝ համապատասխան նախաձեռնությունը լայն աջակցություն չի ստացել եւ «գաղափարն, ամենայն հավանականությամբ, կմնա չլուծված եւ օդում կախված»:

«Մենք չենք տեսնում, որ նախագահ Մակրոնը հետագա քայլեր ձեռնարկի այս խնդրի լուծման համար», - ասել է Նաուսեդան:

Լիտվայի նախագահը նշել է, որ Ֆրանսիայում քաղաքական ցնցումները անբարենպաստ են Ուկրաինայի համար՝ հավելելով, որ «նման նախաձեռնությունները կասկածի տակ են դրվելու և արդեն դրվում են»:

Միևնույն ժամանակ, ֆրանսիացի պաշտոնյան հայտնել է, որ հրահանգիչներ ուղարկելու ծրագիրը մնում է ուժի մեջ, և վերջին խոսքը Ֆրանսիայի նախագահն է:

Մինչ այդ ֆրանսիական «Հայրենասերներ» կուսակցության առաջնորդ Ֆլորիան Ֆիլիպոն հայտարարել էր, որ խորհրդարանական ընտրությունների արդյունքում «Փարիզը ենթակա կմնա Եվրամիության (ԵՄ) եւ ՆԱՏՕ-ի թելադրանքին», ինչի կապակցությամբ Ուկրաինայի հարցում երկրի դիրքորոշումը չի փոխվի: