Գագիկ Խաչատրյանի ընտանիքի դեմ ԱՄՆ–ն քրեական հետապնդումը դադարեցրել է. հայտարարություն

ՀՀ ֆինանսների նախկին նախարար Գագիկ Խաչատրյանի ընտանիքի դեմ հարուցված քրեական հետապնդումը ԱՄՆ դատարանը դադարեցրել է։ Այս մասին այսօր հայտարարություն է տարածել Խաչատրյանների փաստաբանական խումբը։

Փաստաբանական խումբը հրապարակել է այս գործով միջազգային հեղինակավոր «Վինսոն և Էլկինս» իրավաբանական ընկերության, իրենց որակմամբ, բարենպաստ հանգուցալուծման մասին հաղորդագրությունը:

Ըստ այդ հաղորդագրության` արձանագրվել է, որ ԱՄՆ–ում շուրջ 2 տարի տևած հետաքննությունից հետո Խաչատրյանների կողմից որևէ իրավախախտում կատարելու, այդ թվում՝ ԱՄՆ Կալիֆոռնիա նահանգի Հոլմբի Հիլզ թաղամասում գտնվող անշարժ գույքը անօրինական ճանապարհով ստացված եկամուտներով ձեռք բերելու հանգամանք չի հայտնաբերվել և չի հաստատվել։

«Անշարժ գույքի մասով նաև նշվել է, որ հաշվի առնելով գործընթացի խիստ երկարատևությունը և այդ ընթացքում Խաչատրյանների բիզնես գործունեությանը պատճառվող հսկայական կորուստները` Խաչատրյանների և ԱՄՆ կառավարության միջև այն օտարելու շուրջ համաձայնություն է ձեռք բերվել»,– ասված է հաղորդագրության մեջ:

Փաստաբանական խումբն այս գործով ԱՄՆ Արդարադատության դեպարտամենտի որոշումը և վերջինիս կողմից նախաձեռնված քրեական հետապնդման դադարեցումը Խաչատրյանների նշանակալի հաղթանակն է համարում, որով լուծվում է նրանց իրավական վեճը դեպարտամենտի հետ՝ Հոլմբի Հիլզ թաղամասում գտնվող 2011 թվականից կառուցվող անշարժ գույքի վերաբերյալ:

Նշվում է, որ Խաչատրյանների ընտանիքը 2018 թ. թիրախավորվել է ՀՀ նոր իշխանությունների կողմից: 2022 թ. հունվարին Խաչատրյանները վաճառքի են հանել Հոլմբի Հիլզի հիշյալ անշարժ գույքը՝ այդ մասին տեղեկացնելով կառավարությանը։ Արդեն ապրիլին ԱՄՆ Արդարադատության դեպարտամենտը ստացել է ՀՀ կառավարության հայցապահանջը Հոլմբի Հիլզի անշարժ գույքի բռնագանձման վերաբերյալ:

«Ավելի քան երկու տարի տևած քննության արդյունքում Արդարադատության դեպարտամենտը պաշտոնապես ծանուցել է, որ 2024 թ. հունիսի 11–ին դադարեցնում է հետաքննությունը Խաչատրյանների նկատմամբ: Որոշվել է, որ Հոլմբի Հիլզի անշարժ գույքը կվաճառվի և ստացված հասույթը կբաշխվի կողմերի միջև: Ընդ որում՝ Հոլմբի Հիլզի գույքի վաճառքից ստացված մի մասը կտրամադրվի Խաչատրյաններին, իսկ մյուս մասը` Խաչատրյանների դիմումով կտրամադրվի Հայաստանի Հանրապետությանը՝ ի շահ հայ ժողովրդի»,– ասված է հայտարարության մեջ:

Նշվում է, որ 39,750,000 դոլարով վաճառքի հանված առանձնատունն ունի 3,126 քմ մակերես:

Հիշեցնենք` ՀՀ հակակոռուպցիոն դատարանում քննվող ապօրինի ծագում ունեցող գույքի բռնագանձման հայցով էլ ՀՀ ֆինանսների նախկին նախարար Գագիկ Խաչատրյանից և նրան փոխկապակցված 25 անձանցից (ներառյալ` որդիներ Գուրգեն և Արտյոմ Խաչատրյաններից) պահանջվում է բռնագանձել 210 անշարժ գույք, 13 տրանսպորտային միջոց, մասնակցություններ 29 իրավաբանական անձերում, նաև ավելի քան 33 մլրդ դրամ: