Մոդին հայտարարել է, որ սպասում է «իր ընկեր Վլադիմիր Պուտինի» հետ հանդիպմանը

Հնդկաստանի վարչապետը մեկնել է Մոսկվա: Հնդկաստանի վարչապետ Նարենդրա Մոդին մեկնել է Մոսկվա, որտեղ կմասնակցի ռուս-հնդկական գագաթնաժողովի նիստին, հայտնել է նրա գրասենյակը:

Մեկնելուց առաջ քաղաքական գործիչը հայտարարել է, որ անհամբեր սպասում է նախագահ Վլադիմիր Պուտինի հետ հանդիպմանը՝ նրան ընկեր անվանելով: Նա նշել է, որ Հնդկաստանի և Ռուսաստանի միջև հատուկ և արտոնյալ ռազմավարական գործընկերությունը վերջին տասը տարիների ընթացքում առաջ է շարժվել, այդ թվում՝ էներգետիկայի, անվտանգության, առևտրի, ներդրումների, առողջապահության, կրթության, մշակույթի, զբոսաշրջության և միջանձնային փոխանակումների ոլորտներում:

Հնդկաստանի ԱԳ նախարարի առաջին տեղակալ Վինայ Կվատրան ավելի վաղ հայտնել էր, որ Մոդին երեկոյան ներկա կգտնվի Պուտինի հետ մասնավոր ընթրիքին:

Երեքշաբթի օրը քաղաքական գործիչը հանդիպում կունենա Ռուսաստանում հնդկական համայնքի հետ: Դրան կհաջորդի երկու երկրների ղեկավարների նեղ կազմով զրույցը, իսկ հետո տեղի կունենան բանակցություններ պետությունների ղեկավարների գլխավորած պատվիրակությունների մակարդակով:

Ինչպես հայտնել Է Կրեմլի մամուլի ծառայությունը, Պուտինը և Մոդին կքննարկեն ռուս-հնդկական ավանդական բարեկամական հարաբերությունների հետագա զարգացման հեռանկարները, ինչպես նաև միջազգային և տարածաշրջանային օրակարգի արդիական հարցեր: