Կիմ Չեն Ընի քույրը հայտնել է, որ Հարավային Կորեայի նախագահն իր երկիրը դատապարտել է կործանման
Կորեայի Աշխատանքային կուսակցության Կենտկոմի բաժնի ղեկավարի տեղակալ Կիմ Յո Չժոնը, որը Կիմ Չեն Ընի քույրն է, կարծում է, որ Կորեայի Հանրապետության նախագահ Յուն Սոկ Յոլը իր երկիրը դատապարտել է կործանման։ Այս մասին նշվել է Կիմ Յո Չժոնի հայտարարությունում, որը հրապարակել է Կորեայի Կենտրոնական հեռագրական գործակալությունը։
«Բոլորը ստիպված են ընդունել այն փաստը, որ այսպես կոչված նախագահը, որին ընտրել են քաղաքացիները, Կորեայի Հանրապետությունը դատապարտել է կործանման»,- կարծում է Կիմ Յո Չժոնը, որը մամուլի համար արված իր հայտարարությունում սուր քննադատության է ենթարկել հարավկորեական կողմին զորավարժությունների ակտիվացման եւ զորադաշտերում հրաձգության վերականգնման պատճառով։ «Հավաստիացնում եմ, որ կրակի հետ թշնամիների խաղը հերթական սադրանքն է՝ ուղղված իրավիճակի սրմանը»,- ընդգծել է Կիմ Չեն Ընի քույրը։
Կիմ Յո Չժոն հարավկորեացի զինվորականների ակտիվացումը բացատրում է Կորեայի Հանրապետության ներքաղաքական իրավիճակով։ «Յուն Սոկ Յոլը եւ նրա խառնամբոխը փորձում են «պահեստային ելք» գտնել իրավիճակից»,- նշել է նա՝ հիշեցնելով, որ Հարավային Կորեայի իմփիչմենթի խնդրագիրը ավելի քան մեկ միլիոն ստորագրություն է հավաքել։ Նա փաստել է, որ միջկորեական հարաբերություններն այսօր ամենավատ վիճակում են ամբողջ պատմության ընթացքում՝ խոստանալով, որ Հյուսիսային Կորեայի Զինված ուժերը «անհապաղ կկատարեն իրենց առաքելությունը» երկրի ինքնիշխանության խախտման յուրաքանչյուր փորձի դեպքում։
Հուլիսի սկզբին Կորեայի Հանրապետությունը վեցամյա ընդմիջումից հետո վերսկսել է հրաձգությունները Հյուսիսային Կորեայի սահմանին մոտ զորադաշտերում, որոնք դադարեցվել էին երկկողմ պայմանավորվածության շրջանակում։ 2023թ. վերջին Կորեայի Հանրապետությունը ԱՄՆ-ի եւ Ճապոնիայի հետ համատեղ առաջին անգամ Freedom Edge «եռակողմ զորավարժություններն է անցկացրել մի քանի տարածքներում»՝ Հարավկորեական Չեջուդո կղզուց հարավ ընկած միջազգային ջրերում։
