Հայտնի է Ֆրանսիայի վարչապետի հավանական թեկնածուն
Ֆրանսիայի նախկին նախագահ Ֆրանսուա Օլանդը կարող է զբաղեցնել երկրի վարչապետի պաշտոնը խորհրդարանական ընտրություններից հետո, որտեղ ակնհայտ մեծամասնություն չունի կոալիցիաներից ոչ մեկը: Այս մասին «ՌԻԱ Նովոստի» - ի հետ զրույցում հայտարարել է ՌԴ ԱԳՆ ՄԳԻՄՕ-ի Միջազգային հարաբերությունների և Ռուսաստանի արտաքին քաղաքականության ամբիոնի պրոֆեսոր, պատմական գիտությունների դոկտոր Եվգենիա Օբիչկինան։
«Ես կարծում եմ, որ այդ նոր լեգիսլատուրայում մեծ շանսեր կունենա Ֆրանսուա Օլանդը», — ընդգծել է նա՝ հավելելով, որ նա ձախ կենտրոնամետ է եւ «կարողանում է պայմանավորվել»:
Օբիչկինայի գնահատմամբ՝ Ֆրանսիայում ներկայիս քաղաքական պայմաններում տպավորություն է ստեղծվում, որ Օլանդը «ավելի տեսանելի դեմք է դառնում, քան վերջին տարիներին»:
Մինչ այդ Օլանդը հայտարարել էր, որ չի հավակնում ապագա կառավարության ղեկավարի պաշտոնին: Նա ուշադրություն է հրավիրել այն հանգամանքի վրա, որ խորհրդարանի ստորին պալատում բացարձակ մեծամասնության բացակայության պատճառով առանցքային գործոնը կլինի ոչ թե թեկնածուի անձը, այլ քաղաքական դերը, որը Ազգային ժողովը կցանկանա խաղալ: Նախկին նախագահը կանխատեսել է, որ Ֆրանսիայի իշխանությունները կարող են ակնկալել «ինստիտուցիոնալ նորարարություններ»:
