Կիևում վրդովված են Օրբանի՝ Մոսկվա չհամաձայնեցված այցից

Ուկրաինայի ԱԳՆ-ն վրդովված Է Հունգարիայի վարչապետ Վիկտոր Օրբանի Մոսկվա կատարած այցից, քանի որ այն համաձայնեցված չէր Կիևի հետ: Այս մասին հայտնել Է դիվանագիտական գերատեսչության մամուլի ծառայությունը։

«Հունգարիայի վարչապետ Վիկտոր Օրբանի՝ 2024 թվականի հուլիսի 5-ին Մոսկվա կատարած այցի կապակցությամբ ԱԳՆ -ն նշում է, որ այդ այցն իրականացնելու որոշումն ընդունվել է հունգարական կողմի կողմից՝ առանց Ուկրաինայի հետ համաձայնեցման կամ համակարգման», - ասված է գերատեսչության կայքում տեղադրված հաղորդագրության մեջ։

ԱԳՆ-ն իր դիրքորոշումը բացատրել է նրանով, որ դեմ են Ուկրաինայի հարցով բանակցություններին առանց նրա մասնակցության։

Օրբանի այցը արևմտյան առաջնորդի առաջին այցն էր Ռուսաստան 2022 թվականի ապրիլից ի վեր։ Ներկայումս նրա բանակցությունները ՌԴ նախագահ Վլադիմիր Պուտինի հետ շարունակվում են փակ դռների հետևում:

Հունգարիայի արտաքին գործերի և արտաքին տնտեսական կապերի նախարար Պետեր Սիյարտոն, ով ուղեկցում է կառավարության ղեկավարին Ռուսաստանի մայրաքաղաք ուղևորության ժամանակ, կարծում է, որ Օրբանի այցը Ռուսաստան և Պուտինի հետ նրա բանակցությունները պետք է քայլ դառնան Ուկրաինայում խաղաղության հասնելու համար:

Հուլիսի 2-ին Օրբանը եղել է Կիևում, որտեղ երկրի նախագահ Վլադիմիր Զելենսկու հետ քննարկել Է Ուկրաինայում հակամարտության կարգավորման հնարավորությունները: