ԱՄՆ–ն ներգրավված կլինի խաղաղության պայմանագրի գործընթացում. սենատոր Քարդին

ԱՄՆ–ն ունի բոլոր գործիքակազմերը` առաջ մղելու Հայաստանի ու Ադրբեջանի միջև խաղաղության պայմանագրի ստորագրումը։ Այս մասին այսօր ՀՀ ԱԺ–ում ասուլիսի ժամանակ հայտարարեց ԱՄՆ սենատի արտաքին հարաբերությունների հանձնաժողովի նախագահ, սենատոր Բեն Քարդինը։

«Միացյալ նահանգները մեծ դիվանագիտական գործիքակազմ ունի։ Ես չեմ ուզում ասել` ինչպես մենք կկարողանաք այս պարագայում օգտագոծել այդ խառը գործիքակազմը, բայց նշեմ, որ Միացյալ Նահանգները հետաքրքրված է և ցանկանում է առաջ մղել խաղաղության գործընթացը Հայաստանի և Ադրբեջանի միջև»,– ասաց նա։

Սենատորը հավելեց, որ ԱՄՆ–ն ներգրավված կլինի այդ գործընթացում ու կշարունակի աշխատել երկու երկրների գործադիր և օրենսդիր ճյուղերի հետ։

ՀՀ ԱԺ նախագահ Ալեն Սիմոնյանն էլ, անդրադառնալով խաղաղության պայմանագրի ստորագրման գործընթացին, ասաց, որ այս պահին գնդակը Ադրբեջանի դաշտում է։

«ՀՀ–ի կողմից խաղաղության պայմանագրի ստորագրման ձգձգում չկա, մենք պատրաստ ենք այն ստորագրել։ Գործընթացը շարունակվում է, և մենք լիահույս ենք, որ հաջողության կհասնի»,– ասաց նա։