Սխալ է տեղի ունեցածը որպես հիմք օգտագործել՝ մեր սահմաններից դուրս որոշ սադրանքների համար․ Թուրքիայի ԱԳՆ

Թուրքիայի ԱԳՆ-ն հայտարարություն է տարածել Անկարայի կողմից վերահսկվող Հյուսիսային Սիրիայում տեղի ունեցած հակաթուրքական ցույցերի, անկարգությունների և բախումների վերաբերյալ։ 

«Սխալ է Կայսերիում հանցագործությունից հետո, որի համար մեր պետությունը դատական ​​վարույթ է իրականացնում կասկածյալի նկատմամբ, տեղի ունեցած տխուր իրադարձությունները որպես հիմք օգտագործել՝ մեր սահմաններից դուրս որոշ սադրանքների համար։ Թուրքիայի ջանքերն ու սկզբունքային դիրքորոշումը սիրիացի ժողովրդի բարօրության համար վեր են ցանկացած սադրանքից»,- ասվում է հայտարարության մեջ։

Նշենք, որ նախօրեին Սիրիայում զանվածային հակաթուրքական ցույցեր են անցկացվել Թուրքիայում սիրիացի փախստականների նկատմամբ տեղի ունեցած հարձակումներից հետո։ Տարածված տեսանյութերում երևում է, որ ցուցարարները նաև իջեցրել են թուրքական դրոշները, պատռել դրանք, թուրքական ուժերի հետ բախումներ են գրանցվել։ Հաղորդել էինք, որ Թուրքիայում անկարգությունները շարունակվում են։