Յուլիա Նավալնայան գլխավորել է Human Rights Foundation–ը
Ընդդիմության առաջնորդ Ալեքսեյ Նավալնիի այրին՝ Յուլիան, գլխավորել է Human Rights Foundation (HRF) միջազգային իրավապաշտպան կազմակերպությունը։ Այս մասին ասվում է HRF կայքում։ Որպես կազմակերպության նախագահ՝ Նավալնայան փոխարինեց քաղաքական գործիչ Գարրի Կասպարովին, ով այն ղեկավարում էր 2012 թվականից։
«Որպես մարդ, ով առաջին ձեռքից ականատես է եղել բռնապետությունների կողմից մեր սիրելիների և ամբողջ աշխարհի համար սպառնացող վտանգի, ես պատիվ ունեմ ստանձնելու նախագահի պաշտոնը: Այս դժվարին ժամանակներում հիմնարար իրավունքների և ազատությունների պաշտպանությունն ավելի քան երբևէ կարևոր է»,- Նավալնայայի խոսքերն է մեջբերում HRF-ը։
Ընդդիմադիրի այրու խոսքով, Մարդու իրավունքների հիմնադրամի առաքելությունը մոտ է իրեն, և ինքը մտադիր է նպաստել կազմակերպության գաղափարների առաջմղմանը։
X սոցիալական ցանցում իր հայտարարության մեջ Նավալնայան նշել է, որ HRF-ը «միավորում է նրանց, ովքեր պայքարում են բռնապետությունների դեմ ամբողջ աշխարհում»։ Նա հավելել է, որ կազմակերպության հետ համագործակցությունը կօգնի «շարունակել Ալեքսեյի աշխատանքը»:
Time-ը Յուլիա Նավալնայային ներառել է աշխարհի ամենաազդեցիկ մարդկանց հարյուրյակում:
Նավալնայայի թեկնածությունը պաշտպանել է Գարրի Կասպարովը, որը ղեկավարում է Մարդու իրավունքների հիմնադրամը 2012 թվականից։
