Պուտինի պլանը միանգամայն անհեթեթ է․ Պոդոլյակ

Վլադիմիր Զելենսկու գրասենյակի ղեկավարի խորհրդական Միխայիլ Պոդոլյակը հերքել է ԱՄՆ նախկին նախագահ Դոնալդ Թրամփի խորհրդականների առաջարկը ճակատի գծում հակամարտության սառեցման վերաբերյալ։ Պոդոլյակը նշել է, որ այդ կերպ պատերազմը սառեցնելը «տարօրինակ» կլիներ, քանի որ Ռուսաստանը խախտել է միջազգային իրավունքը եւ նրա բանակը գտնվում է ուկրաինական տարածքում։

«Ուկրաինան հստակ հասկանում է, եւ դա գրված է նախագահ Զելենսկու առաջարկած խաղաղության բանաձեւում։ Այնտեղ հստակ գրված է՝ խաղաղությունը պետք է լինի միայն արդարացի եւ պետք է հիմնվի միայն միջազգային իրավունքի վրա»,- ասել է նա Reuters-ի հարցազրույցում։

Պոդոլյակն ավելացրել է, որ պատերազմը չի կարող ավարտվել առանց Ռուսաստանին պատասխաննատվության ենթարկելու։ Նա նաեւ անհեթեթ է անվանել հրադադարի պայմանները, որոնք առաջարկել է Ռուսաստաի նախագահ Վլադիմիր Պուտինը։

«Մենք տեսնում ենք Պուտինի պլանը, այն միանգամայն անհեթեթ է»,- ընդգծել է Ուկրաինայի նախագահի գրասենյակի ղեկավարի խորհրդականը։

Ավելի վաղ հայտնի էր դարձել, որ ԱՄՆ նախկին նախագահ Դոնալդ Թրամփը գալիք նախագահական ընտրություններում հաղթանակի դեպքում կարող է Կիեւից պահանջել խաղաղության բանակցություններ սկսել Մոսկվայի հետ ամերիկյան զենքի մատակարարումների դադարեցման սպառնալիքով։ Դա նախատեսում է Ուկրաինայում ռազմական հակամարտության կարգավորման պլան, որը մշակել են Թրամփի երկու կարեւոր խորհրդականները՝ նրա նախագահության օրոք (2017-2021թթ.) Ազգային անվտանգության խորհրդում շտաբների պետեր, պաշտոնաթող գեներալ-լեյտենանտ Քիտ Քելոգը եւ Ֆրեդ Ֆլեյթցը։ Նախաձեռնությունը ենթադրում է, որ Վաշինգտոնը կսպառնա նաեւ Մոսկվային Կիեւին աջակցությունն ուժեղացնելով, եթե հրաժարվեն բանակցություններից։ Պլանը նախատեսում է հակամարտության սառեցում «առկա ճակատի գծով»։