«Մեր ընկերների և թշնամիների հայացքներն ուղղված են մեզ»․ ինչ են քննարկել Բլինքենն ու Գալանտը
Այցով ԱՄՆ ժամանած Իսրայելի պաշտպանության նախարար Յոավ Գալանտը Վաշինգտոնում հանդիպել է պետքարտուղար Էնթոնի Բլինքենի հետ: Ամերիկյան վարչակազմի ջանքերն ուղղված են Իսրայելի և «Հըզբոլլահ» ահաբեկչական խմբավորման միջև պատերազմի կանխմանը:
«Բլինքենն ընդգծել է հակամարտության էսկալացիան կանխելու անհրաժեշտությունը, դիվանագիտական լուծման կարեւորությունը, որը թույլ կտար լիբանանցի եւ իսրայելցի ընտանիքներին վերադառնալ տուն», – ասված է հանդիպման մասին զեկույցում, որը հրապարակել է Պետդեպարտամենտը:
Գալանտի այցի նպատակներից մեկը Իսրայելի և ԱՄՆ-ի հարաբերություններում լարվածության նվազումն էր։
«Մեր ընկերների և մեր թշնամիների հայացքներն ուղղված են մեզ։ Մենք պետք է արագ հաղթահարենք տարաձայնությունները եւ ուս ուսի կանգնենք», – հայտարարել է իսրայելցի նախարարը։
Քննարկվել է նաև Գազայի հատվածում տիրող իրավիճակը։ Բլինքենն ընդգծել է հումանիտար կազմակերպությունների աշխատակիցների անվտանգության ապահովման անհրաժեշտությունը:
