Ջուլիան Ասանժն ազատ է արձակվել բրիտանական խիստ ռեժիմի բանտից

WikiLeaks միջազգային ոչ առևտրային կազմակերպության հիմնադիր Ջուլիան Ասանժի ազատ արձակումը նման է ԱՄՆ գործող առաջնորդ Ջո Բայդենի հուսահատ փորձին՝ ընտրություններին ընդառաջ ստանալ ազատատենչ ընտրազանգվածի աջակցությունը: Այս մասին հունիսի 24-ին հայտարարել Է ԱՄՆ նախագահի նախկին թեկնածու Վիվեկ Ռամասվամին X սոցիալական ցանցում։ 

«Հրաշալի է, որ Ջուլիան Ասանժին վերջապես ազատ կարձակեն, բայց ամոթալի է, որ նա ստիպված է եղել տարիներ անցկացնել օտարերկրյա բանտում այն բանի համար, ինչ պարբերաբար անում են այլ լրագրողներ: Ջուլիան Ասանժն արժանի է ներման, և վաղուց ժամանակն էր կրկին վերականգնել Ամերիկայում իրավունքի միասնական ստանդարտը», — գրել է նա:

Ընդ որում, ԱՄՆ Հանրապետական կուսակցության ներկայացուցիչ Մարջորի Թեյլոր Գրինը Ռամասվամիի հայտարարությանը ի պատասխան նշել է, որ նախագահի թեկնածու Դոնալդ Թրամփն ամեն դեպքում ազատ կարձակեր Ասանժին:

«Բոլորը գիտեն, որ Դոնալդ Թրամփը պատրաստվում էր ազատ արձակել Ջուլիան Ասանժին», — հայտարարել է կոնգրեսականը:

Ջուլիան Ասանժը հունիսի 24-ի առավոտյան լքել է բրիտանական բելմարշ խիստ ռեժիմի բանտը: Լոնդոնի Բարձր դատարանը նրան գրավի դիմաց ազատ է արձակել, որից հետո Ասանժը ինքնաթիռ է նստել Սթանսթեդ օդանավակայանում և մեկնել Մեծ Բրիտանիայից:

Նույն օրը ԱՄՆ-ը հայտնել է, որ WikiLeaks-ի հիմնադիր Ջուլիան Ասանժը ԱՄՆ դատախազության հետ գործարքի շրջանակներում մտադիր է ընդունել ներկայացված մեղադրանքների մի մասը, փոխարենը ամերիկյան դատախազությունը չի պահանջի նրա արտահանձնումը:

Մինչ այդ՝ մարտի 20-ին, The Wall Street Journal-ը, հղում անելով իր աղբյուրներին, հայտնել էր, որ ամերիկյան արդարադատության նախարարությունն ուսումնասիրում Է Ասանժի իրավական հետապնդումն ավարտելու հնարավորությունը՝ նրան իրավունք տալով ընդունել մեղավորությունը մեղմացված կերպով: Լրագրողների տեղեկություններով՝ սա գործարքի հնարավորություն է բացում, որը կարող է հանգեցնել լրագրողի ազատ արձակմանը Բրիտանական բանտից:

Լրագրողը կալանքի տակ էր գտնվում Մեծ Բրիտանիայում։ ԱՄՆ-ը նրան մեղադրանք է ներկայացրել 18 կետով, այդ թվում ՝ լրտեսության և գաղտնի տեղեկությունների բացահայտման մասին օրենքի խախտման համար: Նրան սպառնում է 175 տարվա ազատազրկում։