Ջուլիան Ասանժն ազատ է արձակվել բանտից և մեկնել Մեծ Բրիտանիայից. WikiLeaks
Լոնդոնի Գերագույն դատարանը WikiLeaks-ի հիմնադիր Ջուլիան Ասանժին գրավի դիմաց ազատ է արձակել: Վերջինս 2019 թվականից գտնվում է Լոնդոնի Բելմարշ բանտում:Այս մասին գրում է RTVI–ը՝ հղում անելով կազմակերպության՝ X սոցիալական ցանցում արած հայտարարությունը:
Նշվում է, ո ժր լրագրողը գործարք է կնքել ԱՄՆ դատախազության հետ:
«Ջուլիան Ասանժն ազատ է: Հունիսի 24-ի առավոտյան նա լքել է Բելմարշի խիստ ռեժիմի բանտը այնտեղ 1901 օր անցկացնելուց հետո։ Լոնդոնի Գերագույն դատարանը նրան բաց է թողել գրավի դիմաց, և այսօր կեսօրին Սթենսթեդ օդանավակայանում նա ինքնաթիռ է նստել և մեկնել Մեծ Բրիտանիայից», - նշում է WikiLeaks–ը:
Կազմակերպությունը լրագրողի ազատ արձակումն անվանել է «համաշխարհային արշավի արդյունք», որում ներգրավված են «մամուլի ազատության ակտիվիստներ, օրենսդիրներ և առաջնորդներ ամբողջ քաղաքական սպեկտրից՝ ընդհուպ մինչև ՄԱԿ»:
«Սա պայմաններ ստեղծեց ԱՄՆ արդարադատության նախարարության հետ երկարատև բանակցությունների համար, ինչը հանգեցրեց գործարքի, որը դեռ պաշտոնապես չի ավարտվել: Մենք հնարավորինս արագ կտրամադրենք հավելյալ տեղեկատվություն»,- ասվում է X-ի հաղորդագրության մեջ:
WikiLeaks-ի ներկայացուցիչները նշել են, որ Ասանժը մեկնել է Ավստրալիա, որտեղ գտնվում են նրա կինն ու երեխաները։
