Նասրալլան Իսրայելին և Կիպրոսին պատերազմով է սպառնացել

Լիբանանյան «Հըզբոլլահ»-ի ղեկավար Սայեդ Հասան Նասրալլան պատերազմով է սպառնացել Իսրայելին և Կիպրոսին։ Այս մասին գրում է Reuters-ը։

Հեռուստաուղերձում Նասրալլան հայտարարել է․ «Իսրայելում ավելի լայնածավալ պատերազմի դեպքում մեր հրթիռներից և անօդաչու թռչող սարքերից պաշտպանվելու անվտանգ տեղ չի լինի»։

Ակնարկելով նաև Միջերկրական ծովում գործողությունների մասին՝ «Հըզբոլլահ»-ի ղեկավարն ասել է, որ Իսրայելն «այժմ պետք է մեզ սպասի ցամաքում, օդում և ծովում»։

«Հըզբոլլահ»-ի ղեկավարն առաջին անգամ սպառնացել է նաև ԵՄ անդամ երկիր Կիպրոսին և մեղադրել նրան իր օդանավակայաններն ու բազաները զորավարժությունների համար Իսրայելի առաջ բացելու մեջ։

«Կիպրոսի կառավարությունը պետք է նախազգուշացվի՝ Լիբանանը թիրախավորելու համար Իսրայելի համար կիպրական օդանավակայանների և բազաների բացումը նշանակում է, որ Կիպրոսի կառավարությունը դարձել է պատերազմի մի մասը, և մենք էլ դրանով կզբաղվենք որպես պատերազմի մաս», - ասել է Նասրալլան: