Թուրքիան օգնել է կանխել Մոսկվայում «Կրոկուսից» հետո երկրորդ ահաբեկչությունը․ ԶԼՄ

Թուրքիայի հատուկ ծառայությունները զգուշացրել են ռուս գործընկերներին և օգնել կանխել Մոսկվայում երկրորդ ահաբեկչությունը «Կրոկուս Սիթի Հոլ» առևտրի կենտրոնի վրա հարձակումից հետո: Այս մասին հայտնել է կառավարամետ Hürriyet թերթը։


«Համերգասրահի վրա առաջին հարձակումից հետո ահաբեկչական խմբավորումը ծրագրել է երկրորդ ահաբեկչությունը։ Նրանք պատրաստվում էին հարձակվել լեփ - լեցուն առևտրի կենտրոնի վրա։ Թուրքական հետախուզությունը կանխել է այս երկրորդ խոշոր ահաբեկչությունը՝ կապ հաստատելով Մոսկվայի հետ», - գրում է թերթի մեկնաբանը։


Պարբերականի տվյալներով՝ ահաբեկչությունը նախապատրաստել են ՌԴ-ում արգելված «Վիլայաթ Խորասան» խմբավորման զինյալները, որը կապված է «Իսլամական պետություն» ահաբեկչական կազմակերպության հետ: Hurriyet-ը նշում է, որ թուրքական հատուկ ծառայությունները տևական ժամանակ հետևել են «Վիլայաթ Խորասան» կազմակերպության տեղական բջջի գործունեությանը, որը մեղսակից է հունվարի վերջին Ստամբուլում Սուրբ Մարիամ կաթոլիկ եկեղեցու վրա կատարված հարձակմանը: Հատուկ ծառայությունները դուրս են եկել մի քանի անձանց վրա, հարցաքննել նրանց, որից հետո կապ է հաստատվել ռուսական կողմի հետ։


Պարբերականը հիշեցնում է, որ առևտրի կենտրոնի վրա հարձակում գործած երկու անձինք ահաբեկչությունից քիչ առաջ եղել են Թուրքիայում, ինչի մասին տեղեկացվել են նաև Ռուսաստանի իրավապահ մարմինները:


Մերձմոսկվայում «Կրոկուս Սիթի Հոլում» ահաբեկչությունը տեղի է ունեցել մարտի 22-ին: Վերջին տվյալներով՝ զոհվել է 144 մարդ, տուժել՝ 551-ը։ Ահաբեկչության անմիջական կատարողներից չորսը ձերբակալված են, եւս հինգ մարդ, Ինչպես ենթադրում է հետաքննությունը, հանցակիցներ են: ՌԴ Քննչական կոմիտեում ավելի վաղ հայտարարել էին, որ ապացուցել են ահաբեկչություն իրականացնողների կապը ուկրաինացի ազգայնականների հետ:


Հետաքննության տվյալներով՝ ահաբեկիչների նախապատրաստական գործողությունները, ֆինանսավորումը, հարձակումն ու հեռացումը համացանցի միջոցով համակարգվել են «Վիլայաթ Խորասան» խմբավորման անդամների կողմից:

Քաղաքականություն

Պատահարներ