Պատերազմն արագ կտարածվի․ Գերմանիայից նախազգուշացում են արել
Գերմանիայի ԱԳ նախարար Անալենա Բերբոքը նախազգուշացրել է Ուկրաինային օգնության կրճատման դեպքում Բեռլինի և ՆԱՏՕ-ի համար վտանգավոր հետևանքների մասին: Այս մասին գրում է DW-ի ռուսական ծառայությունը։
«Եթե մենք չշարունակենք օգնել Ուկրաինային, վտանգ կա, որ Պուտինի զորքերը կկանգնեն Լեհաստանի հետ սահմանին, այնուհետև պատերազմն արագ կտարածվի ԵՄ-ի և ՆԱՏՕ-ի տարածքում։ Դժվար է հաշվարկել, թե որքան պետք է վճարենք, եթե ստիպված լինենք ինքներս պաշտպանել մեր ազատությունն ու անկախությունը։ Վերջնարդյունքում այն հանգում է մի բանի՝ Ուկրաինային աջակցությունը թույլ է տալիս պատերազմը պահել հենց մեզանից հեռու»,- ասել է նա։
Բերբոքը նախազգուշացրել է նաև փախստականների նոր հոսքի սպառնալիքի մասին։
Գերմանիայի ԱԳ նախարարը նշել է․ «Եթե Ուկրաինան այլևս ի վիճակի չլինի պաշտպանել իրեն, և ես այս խոսքերն ուղղում եմ հիմնականում նրանց, որոնք մերժում են Կիևին օգնությունը, ապա միլիոնավոր մարդիկ ստիպված կլինեն փախչել: Ի վերջո, ո՞վ կցանկանա կամավոր ապրել խոշտանգումների և օկուպացիայի պայմաններում»։
