Չինաստանի հարավ-արևելքում հազարավոր մարդիկ են տարհանվել այն բանից հետո, երբ անցած հանգստյան օրերին տարածաշրջանում տեղացած հորդառատ անձրևները ջրհեղեղներ և մահացու սողանքներ են առաջացրել, երկուշաբթի հայտնել են իշխանությունները և պետական լրատվամիջոցները:

CCTV պետական հեռուստաընկերության տվյալներով՝ շաբաթ օրվա դրությամբ տարհանվել է ավելի քան 35,000 մարդ։ Երկուշաբթի առավոտյան Գուանդուն նահանգի ջրհեղեղից առավել տուժած Մեյչժոու քաղաքում տարհանվել է ավելի քան 10,000 մարդ:

Երկուշաբթի օրը հրապարակված ջրային ռեսուրսների նախարարության տվյալներով՝ Խան խոշոր գետի ավազանում` տասնյոթ ջրուղիներում «գրանցվել են ջրհեղեղներ, որոնք գերազանցում են նախազգուշացման մակարդակը», այդ թվում ՝ երկու գետերում ջրհեղեղի մակարդակը հասել Է ռեկորդային թվի:

127 միլիոն բնակչություն ունեցող տնտեսական կենտրոն Գուանդուն նահանգը Հարավային Չինաստանի այն շրջանների շարքում է, որոնք ամեն տարի ապրիլից սեպտեմբեր ընկած ժամանակահատվածում ջրհեղեղների են ենթարկվում: Բայց վերջին տարիներին տարածաշրջանը բախվել է ավելի ինտենսիվ անձրևների և ուժեղ ջրհեղեղների, քանի որ գիտնականները նախազգուշացնում են, որ կլիմայական ճգնաժամը կուժեղացնի ծայրահեղ եղանակային իրադարձությունները՝ դրանք դարձնելով ավելի մահացու և հաճախակի:

Այս նախազգուշացումները հնչեցվել են ապրիլին, երբ բազմօրյա անձրևներից հետո Գուանդուն նահանգի որոշ շրջաններում մահացու ջրհեղեղներ են տեղի ունեցել:

Երկուշաբթի հորդառատ անձրևները հետագա ավերածությունների պատճառ են դարձել, և սոցիալական ցանցերում տեսանյութեր են հայտնվել Գուանդուն նահանգի արևելքում գտնվող Մեյչժոու քաղաքից, որոնք ցույց են տալիս, թե ինչպես է գետի ջուրը գրեթե դուրս գալիս ափերից՝ հեղեղելով կամուրջները և մասամբ հեղեղելով տրանսպորտային միջոցները:

Այս ամիս Չինաստանը բախվել է ծայրահեղ եղանակային պայմաններին` հորդառատ անձրևները հեղեղել են երկրի հարավը, մինչդեռ սաստիկ երաշտը և ռեկորդային ջերմաստիճանը այրում են հյուսիսը:

Չինաստանի այլ տարածքներ նույնպես ամեն տարի բախվում են ծայրահեղ ջերմության և երաշտի ավելի վաղ և երկար ժամանակահատվածների, ինչը հանգեցնում է էլեկտրաէներգիայի համատարած պակասի և սննդի և արդյունաբերական մատակարարման շղթաների խափանումների: