Բա որ մի օր լույսերը տարան․ Արարատ Միրզոյանը՝ Փաշինյանին

ԱԳ նախարար Արարատ Միրզոյանը «Ամպայինն՝ առաջինը» համակարգի ներդրման նախագծի քննարկման ժամանակ ասել է, որ թեև փաստաթղթերը թվայնացվելու են, բայց շատ դեպքերում թղթային բնօրինակները պահելու կարիք կա։

Վարչապետ Նիկոլ Փաշինյանը նշել է, որ երբ փաստաթղթերը տեղադրվում են ամպային տիրույթում, թղթերը չեն վառվում։

«Մի հատ համոզվում ենք՝ դա աշխատու՞մ է, ընդ որում, հետագայում՝ երկարաժամկետում, պետք չի լինելու ձեր ասածը պահել, որովհետև ամպային տիրույթում, ենթադրվում է, դա մի քանի տեղ, մի քանի շերտում է պահվում, և եթե մեկի հետ մի բան տեղի ունենա, երկրորդ տեղից կարելի է վերցնել կամ վերականգնել»,- նշեց նա։

Ըստ վարչապետի, քանի որ նոր պրակտիկա է, կգնան փուլային տարբերակով. «Որ միանգամից ամեն ինչ չլցնենք այնտեղ, հետո մատներս սխալ կոճակի կպչի, պարզվի՝ ամբողջը կորել է»։

«Մոտավորապես նման հարց էի ուզում տալ, բայց կոճակը մտքովս չէր անցել, ասում էի՝ բա որ մի օր լույսերը տարան։ Կարող է՝ 18 տարի ամեն ինչ նորմալ լինի, 19-րդ տարում ինտերնետի մալուխը կտրվի կամ համակարգը խափանվի»,- մտահոգվեց Միրզոյանը։

Վարչապետն, արձագանքելով, ասաց. «18 տարի որ ասում եք, 18 տարվա հարցը 20 տարի առաջ շատ երկրներ լուծել են, որովհետև դրանից առաջ 50 տարի փորձարկումներով էին զբաղված»։

Ըստ նրա՝ «սա մոտավորապես նույնն է, որ գութանը ձիու վրայից հանեն, գցեն տրակտորին»։

 «Էն ժամանակ էլ բազմաթիվ մտահոգություններ են եղել՝ տրակտորի հետ կապված»,- ասաց նա։