18+ ՏԵՍԱՆՅՈՒԹ. Փլուզվել է գիշերային ակումբի երրորդ հարկի պատշգամբը. կան զոհեր և վիրավորներ. Մեքսիկա
Մեքսիկայում երեք մարդ է զոհվել, 16-ը՝ վիրավորվել Rich գիշերային ակումբի երրորդ հարկի պատշգամբի փլուզման հետևանքով։ Այս մասին հայտնում է մեքսիկական Diario de Yucatán թերթը։
«Սան Լուիս Պոտոսիի Լոմաս Կուարտա շրջանում Սիերա Լեոնե փողոցի Պլազա Ալտուսում գտնվող Rich գիշերային ակումբում ապակե բազրիք է փլուզվել։ Մի քանի երիտասարդներ ընկել են երրորդ հարկից: Երեքը մահացել են տեղում, 16-ը վիրավորվել»,- ասվում է հրապարակման մեջ։
Նշվում է, որ մարդկանց հոծ բազմությունը հավաքվել էր երգիչ Քևին Մորենոյի համերգին։
«Այս միջոցառմանը մարդկանց անվերահսկելի ներկայությունը հանգեցրել է նրան, որ Altus առևտրի կենտրոնի երրորդ հարկի ճաղերից մեկը ենթարկվել է ճնշման, ինչն էլ պատճառ է դարձել այս ողբերգությանը», - ասել է քաղաքային խորհրդի քարտուղարը:
Տուժածներից հինգը ստացել են կյանքին վտանգ սպառնացող լուրջ վնասվածքներ և գտնվում են վերակենդանացման բաժանմունքում։
