Եթե ուզում ենք ունենալ պետություն, արժանապատիվ կյանք, պատիվ ունենալ. սա է ճանապարհը. Բագրատ Սրբազան
Եթե ուզում ենք ունենալ պետություն, արժանապատիվ կյանք, պատիվ ունենալ, գործել սիրո, հաշտության, արդարության մեջ, սա է ճանապարհը: Այս մասին այսօրվա հանրահավաքի ժամանակ հայտարարել է Բագրատ Սրբազանը:
«Մենք ձեզ ոչ ցրում ենք, ոչ մարում ենք, հակառակ, պարտավոր ենք տեղեկացնել ձեզ, խոսել սխալների մասին, չտրվել զգացմունքներին՝ միաժամանակ չոչնչացնելով դրանք»,– ասել է նա:
Նա նշել է, որ վաղը Հայաստանի 10-ը վայրերում, Երեւանում, մարզերում, խաղաղ անհնազանդության, անհամաձայնության գործողություններ են իրականացվելու։
«Բնականաբար, դրանց մասին չենք կարող նախապես տեղեկացնել»,– ասել է նա։
Նա նաև հորդորել է «բարեկիրթ զրույցներ ունենալ» ՔՊ խմբակցության պատգամավորների հետ:
«Մինչև մյուս ուրբաթ, բոլորդ խաղաղ, բարեկիրթ, համառ զրույցներ ունեցեք ՔՊ խմբակցության պատգամավորների հետ։ Շատ կարևոր է, որ մենք կարողանանք որոշակի իմաստով բացատրական աշխատանքներ տանել, շատ խաղաղ, առանց որևէ ագրեսիայի կամ հայհոյանքի»,– ասել է նա:
Բագրատ սրբազանը հանրահավաքի ժամանակ հանձնարարել է նաև մինչև կիրակի երեկոյան մշակել և կազմել խաղաղ բանակցությունների սահմանազատման և գծման հստակ հայեցակարգը և այդ բանակցությունների անընդհատականությունը։
«Որպեսզի այս մարդկանց ներկայացնենք թե ինչ ենք ուզում։ Ցույց տանք տարբերությունը, որ մարդիկ իմանան ինչպես են խաբված ու ստված, որ իմանան իրական պատկերը որը պետք է լինի։ Երկրորդը՝ մեր խնդրանքն է, որ նախկին զինվորականներն ու պահեստազորի սպաներ պետական անվտանգության բարձրացման հայեցակարգ ներկայացնեն»,- ասել է Սրբազանը։
