Եվրոպայում բարձր ինտենսիվությամբ պատերազմի հնարավորությունն այլևս ֆանտազիա չէ․ Բորել

Եվրոպայի վրա ԱՄՆ-ի «պաշտպանական հովանոցը» կարող է շուտով փակվել, եթե Դոնալդ Թրամփը վերադառնա Սպիտակ տուն, ուստի Եվրոպան այս հարցում պետք է հույսը դնի միայն իր վրա, նույնիսկ ՆԱՏՕ-ի ներսում: Այս մասին հայտարարել է Եվրամիության դիվանագիտական ծառայության ղեկավար Ժոզեպ Բորելը Բրյուսելում կայացած խորհրդաժողովում։

«Ամերիկյան պաշտպանական հովանոցը, որը պաշտպանում էր Եվրոպան սառը պատերազմի տարիներին, կարող է «շուտով փակվել»՝ կախված նրանից, թե ով կարող է հայտնվել Սպիտակ տանը։ Ուստի ԵՄ-ն պետք է պաշտպանության մեջ հույսը դնի միայն իր վրա։ ՆԱՏՕ–ի կարևորությունը պահպանվում է, բայց ՆԱՏՕ-ի ներսում պետք է հայտնվի եվրոպական բաղադրիչ», - Բորելի խոսքը մեջբերում է ՌԻԱ Նովոստին։

Նրա խոսքով՝ «Եվրոպայում բարձր ինտենսիվությամբ պատերազմի հնարավորությունն այլեւս ֆանտազիա չէ», ուստի ԵՄ երկրները «պարտավոր են անել հնարավորը դրանից խուսափելու համար»:

Եվրամիության դիվանագիտական ծառայության ղեկավարն ընդգծել է, որ «հակառակորդին զսպելու համար» միջոցներ են անհրաժեշտ ավելի շատ զենք արտադրելու համար:

«Մենք պետք է ավելացնենք մեր ֆինանսական հնարավորությունները։ Ես չգիտեմ, թե ինչպես, հնարավոր է, վարկերի միջոցով», - ենթադրել է նա։