Մենք դա չենք մոռանա․ Մեդվեդև
Ռուսաստանի Անվտանգության խորհրդի փոխնախագահ Դմիտրի Մեդվեդևը X սոցցանցի իր էջում ԱՄՆ-ի, Ֆրանսիայի, Մեծ Բրիտանիայի և Գերմանիայի ղեկավարներին անվանել է «Կրոկուս Սիթի Հոլում» ահաբեկչության հանցակիցներ, իսկ «ուկրաինացի բանդերականներին»՝ ահաբեկչության իրական պատվիրատուներ:
«Դե ինչ, Միացյալ Նահանգների և եվրոպական երկրների հարգելի առաջնորդներ։ Ահաբեկիչների հայտարարություններն այն մասին, թե իրենց մեկական միլիոն ռուբլի են խոստացել Կիևում, և որ նրանք պետք է անցնեին ռուս-ուկրաինական սահմանի անցքով, ձեզ բավարա՞ր չեն։ Ահաբեկչությունը պատվիրվել է Իսլամական պետության կողմից, Այնպես չէ՞: Իրական պատվիրատուները Ուկրաինական բանդերական տականքներն են, ձեր կերածները։ Իսկ այդ սպանության հանցակիցները դուք եք՝ Բայդենը, Մակրոնը, Սունակը, Շոլցը և այլ հանցակիցներ։ Մենք դա չենք մոռանա»,- գրել է Մեդվեդևը։
Նախօրեին «Ռոսիա 1» հեռուստաալիքի «Вести недели» հաղորդման ժամանակ ցուցադրվել են «Կրոկուս Սիթի Հոլում» ահաբեկչության մեջ մեղադրվողների հարցաքննության կադրերը: Գործի ֆիգուրանտներն ոմն Սայֆուլոյին անվանել են համակարգող, որը նշել է հարձակման վայրը, Ուկրաինայի հետ սահման մեկնելու ճանապարհը եւ դրամական պարգեւատրում խոստացել:
