ՏԵՍԱՆՅՈՒԹ. Ակնկալում եմ` դատախազներն ամեն ինչ կանեն, որպեսզի ահաբեկիչները պատիժ կրեն․ Պուտին
ՌԴ նախագահ Վլադիմիր Պուտինն ակնկալում է, որ դատախազներն անհրաժեշտ ամեն ինչ կանեն, որպեսզի «Կրոկուս Սիթի Հոլ»–ում տեղի ունեցած ողբերգության մեղավորներն արդար պատիժ կրեն:
«Ակնկալում եմ, որ դատախազներն իրենց լիազորությունների շրջանակում, այդ թվում՝ պետական մեղադրանք ներկայացնելիս և դատական գործընթացի ընթացքում, կանեն անհրաժեշտ ամեն ինչ, որ հանցագործները արդար պատիժ կրեն, ինչպես դա պահանջում է ռուսական օրենքը», - ասել է Պուտինը գլխավոր դատախազության կոլեգիայի ընդլայնված նիստում:
Ռուսաստանի նախագահը հավելել է, որ քննիչներն իրենց հերթին պարզում են մերձմոսկովյան «Կրոկուս Սիթի Հոլ»–ում տեղի ունեցած ահաբեկչության մանրամասները:
«Հանցագործները, որոնք անմիջականորեն կատարել են այդ զանգվածային սպանությունը, ինչպես գիտեք, ձերբակալված են։ Քննիչները հանգամանորեն պարզում են այս բարբարոսական հանցագործության հանգամանքները, մանրամասները, յուրաքանչյուր մասնակցի դերը, մեղքի աստիճանը, ուսումնասիրում քրեագետների և փորձագետների եզրակացությունները», - ասել է նա:
Հիշեցնենք` մարտի 22-ին Մոսկվայի շրջանի «Կրոկուս Սիթի Հոլ»–ում համերգից առաջ հրաձգություն է եղել, այնուհետև հրդեհ է բռնկվել: Վերջին տվյալներով` ահաբեկչության հետևանքով 139 մարդ է մահացել (այդ թվում՝ 3 երեխա)։
Ռուսաստանի քննչական կոմիտեն ահաբեկչության մասին քրեական գործ է հարուցել։ Ձերբակալվել է 11 մարդ, այդ թվում` 4 ահաբեկիչները` Դալերջոն Միրզոևը, Ռաչաբալիզոդա Սաիդակրամին, Մուհամադսոբիր Ֆայզովը և Ֆարիդունի Շամսիդինը։ Նրանց ցմահ ազատազրկում է սպառնում։ Նրանք, ինչպես նաև ահաբեկչությանն օժանդակելու մեջ մեղադրվող Իսրայել, Դիլովար և Ամինչոն Իսլոմովները կալանավորվել են մինչև մայիսի 22-ը։
