Ակադեմիական քաղաքը կունենա երկաթուղի, մետրո ու տրամվայ. ԿԳՄՍ նախարար
Ակադեմիական քաղաքը կունենա երկաթուղային կայարան ու տրամվայի հատուկ գծեր։ Այս մասին այսօր ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի արտահերթ նիստի ժամանակ հայտարարեց ԿԳՄՍ նախարար Ժաննա Անդրեասյանը։
«Մի քանի եղանակներով է ապահովվելու տրանսպորտը` երկաթուղի, մետրո։ Տրամվայ է պլանավորվում նաև։ Գիտեք` Ակադեմիական քաղաքի մոտով է անցնում Հյուսիս–հարավ մայրուղին, նաև բավականին զարգացած ճանապարհային ցանց կա, այդ ճանապարհների նախագիծը առանձին նախագիծ է, որը այժմ քննարկվում է ու նաև նախնական ներկայացվել է կառավարությանը»,– ասաց Անդրեասյանը։
Նա տեղեկացրեց, որ մինչև հունիս պատրաստ կլինի ակադեմիական քաղաքի ամբողջությամբ մշակված գլխավոր հատակագիծը։ Իսկ զուգահեռաբար աշխատանքներ են տարվում ճանապարհային ցանցի ու անհրաժեշտ ենթակառուցվածքների նախագծման ուղղությամբ։
«Ակադեմիական քաղաքի տարածքով անցնում է երկաթուղային գիծ, որն այս պահին օգտագործվում է որպես բեռնատար։ Մենք այն կիրառելու ենք ուղևորատար նպատակներով։ Երկաթուղին ուզում ենք դարձնել Ակադեմիական քաղաքի հիմնական տրանսպորտային հանգույցը, որը կսկսի «Սասունցի Դավիթ» կայարանից ու կգնա դեպի Ակադեմիական քաղաք»,– ասաց նա։
Նախարարաը տեղեկացրեց, որ առաջին փուլում երկաթուղային կայարանից բացի կնախագծվի Ակադեմիական քաղաքի ստադիոնն ու բազմաֆունկցիոնալ համերգասրահը։
Հիշեցնենք` ՀՀ կառավարությունը պատրաստվում է ակադեմիական քաղաք կառուցել և այնտեղ տեղափոխել բուհերն ու գիտական համալսարանները` դրանք հավաքելով մեկ հարթակում։
Ակադեմիական քաղաքի համար կհատկացվի Երևանի 17-րդ թաղամասն ու «Հայֆիլմի» տարածքը։
