ԱՄՆ-Մեքսիկա սահմանին զինվորական հագուստով դիակներ են հայտնաբերվել․ ԶԼՄ

ԱՄՆ-Մեքսիկա սահմանից ոչ հեռու բանակային հագուստով յոթ դիակ են հայտնաբերել։ Այս մասին հաղորդում է Associated Press-ը: Տեղեկությունը փոխանցում է ՌԻԱ Նովոստին։

«Չորեքշաբթի հյուսիսային սահմանամերձ Սոնորա նահանգի դատախազները հայտարարել են, որ յոթ դիակները հայտնաբերվել են Պուերտո Պենասկո քաղաքի մոտակայքում գտնվող ճանապարհից ոչ հեռու՝ Կալիֆոռնիայի ծոցում, որը հայտնի է նաև որպես Կորտեսի ծով»,-ասվում է հրապարակման մեջ:

Գործակալությունը հայտնում է, որ Մեքսիկայի Խալիսկո նահանգում հայտնաբերել են ևս 5 դիակ՝ շարված փամփուշտակայուն ամենագնացի մեջ:

Նշվում է, որ բոլոր զոհվածները տղամարդիկ են եղել, որոնք զինվորական ոճի հագուստ են կրել: Մեքսիկայի դատախազությունը հավելել է, որ նրանց բոլորին գնդակահարել են։