Հարավային Կովկաս կատարած այցի ընթացքում քննարկվելու են ինչպես տարածաշրջանային անվտանգությանը, այնպես էլ Հայաստանի և Ադրբեջանի հարաբերությունների կարգավորմանը վերաբերող հարցեր։ Այս մասին Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան հայտնել է X–ի իր միկրոբլոգում։ 

«Հաճելի է վերադառնալ Կովկաս՝ այս անգամ ուղեկցելով ՆԱՏՕ-ի գլխավոր քարտուղար Յենս Ստոլտենբերգին Հայաստան, Ադրբեջան և Վրաստան պատմական այցի ընթացքում: Կքննարկվեն երկկողմ համագործակցությանը, Ուկրաինային տրվող աջակցությանը և տարածաշրջանային անվտանգությանը վերաբերող հարցեր, այդ թվում՝ Հայաստանի և Ադրբեջանի միջև հարաբերությունների կարգավորումը»,- գրել է նա։ 

Հիշեցնենք՝ մարտի 17-ին ՆԱՏՕ-ի գլխավոր քարտուղար Յենս Ստոլտենբերգը պաշտոնական այցով մեկնել է Ադրբեջանի Հանրապետություն։ Հիմա նա Վրաստանում է, որտեղից գալու է Հայաստան։