Գագիկ Մելքոնյանը միայն երեկ է իմացել, որ իր դեմ ահաբեկչություն է կազմակերպվել
Քննչական կոմիտեն տեղեկացնում է, որ բացահայտվել են ահաբեկչության դեպքեր, որոնք ուղղված են եղել իշխող «Քաղաքացիական պայմանագիր» կուսակցության, նրա անդամների, այդ թվում՝ խմբակացության պատգամավորներ Գագիկ Մելքոնյանի և Գուրգեն Արսենյանի դեմ:
Մասնավորապես, կոմիտեի փոխանցմամբ, քաղաքացի Գ.Ս.-ն բնակչությանը ահաբեկելու, իշխանության մարմինների գործունեությունը կազմալուծելու համար կազմակերպել է ահաբեկչություն պատգամավոր Գագիկ Մելքոնյանի դեմ՝ նպատակ ունենալով նրան զերծ պահել քաղաքական կոնկրետ հայտարարություններից և դիրքորոշումներից։ Թե որ հայտարարությունների մասին է խոսքը, իրավապահ մարմինը չի մանրամասնում:
Գագիկ Մելքոնյանը միայն երեկ է իմացել, որ իր դեմ ահաբեկչություն է կազմակերպվել, և հարևանի տան բակ դեռևս անցած ամիս նետված պայթուցիկի թիրախը հենց ինքն է եղել:
«Ոչ, ես չեմ իմացել, որ թիրախում ես եմ: Ուղղակի անցած օրը, երբ որ արդեն տեղեկացա ես, որ դրանց ձերբակալել են, իրենք արդեն ցուցմունք են տվել, որ տունը շփոթել են՝ փոխարեն մեր տան բակը գցեին, գցել են ուրիշ տեղ», - «Ազատությանը» ասաց Մելքոնյանը:
Իշխանական պատգամավորը կարծում է, որ իր դեմ ահաբեկչության ետևում ռուսամետ ուժերն են կանգնած. - «Էդ 20 թվի նոյեմբերի 9-ից սկսեցին պայքար ՔՊ-ի դեմ՝ ընդդիմությունը, շարասյունը 5-րդ, ռուսական ագենտները, որ, ասենք, իշխանափոխություն ըլնի, միանգամից իշխանափոխությունից հետո արդեն կգան էն մարդիկ, որ ռուսամետ են և Ռուսաստանի ենթակայության տակ կմտնեն, ու ամեն ինչը սենց հալած յուղի պես կգնա»:
Մանրամասները՝ սկզբնաղբյուր կայքում։
