ԱՄՆ-ն գաղտնի բանակցել է Իրանի հետ. ԶԼՄ

ԱՄՆ-ն հունվարին գաղտնի բանակցություններ է վարել Իրանի հետ, որպեսզի Թեհրանին համոզի ազդեցություն գործել հութիների վրա (Եմենի հյուսիսում իշխող «Անսար Ալլա» շարժում) Կարմիր ծովում նավերի վրա նրանց հարձակումների ֆոնին: Այս մասին գրում է «Financial Times» թերթը՝ հղում անելով ամերիկացի և իրանցի պաշտոնյաների, փոխանցում է ՌԻԱ Նովոստին։

«ԱՄՆ - ն այս տարի գաղտնի բանակցություններ է վարել Իրանի հետ ՝ նպատակ ունենալով համոզել Թեհրանին օգտվել Եմենի հութիների նկատմամբ իր ազդեցությունից, որպեսզի վերջ դնի Կարմիր ծովում նավերի վրա հարձակումներին», - գրում է թերթը:

Նշվում է, որ բանակցությունները տեղի են ունեցել հունվարին Օմանում, ընդ որում՝ ԱՄՆ-ի և Իրանի ներկայացուցիչները շփվել են միջնորդների օգնությամբ. այդ դերը ստանձնել են Օմանի պաշտոնյաները: Բանակցությունների արդյունքները չեն հստակեցվում։

Եմենի հյուսիսում իշխող «Անսար Ալլա»շարժումը, որը վերահսկում է Կարմիր ծովի եմենյան ափերի մեծ մասը, ավելի վաղ նախազգուշացրել էր, որ կհարձակվի Իսրայելի հետ կապ ունեցող ցանկացած նավի վրա և մյուս երկրներին հորդորել էր հետ կանչել իրենց անձնակազմերը։

Հավելենք, որ հութիները հայտարարել են, որ Կարմիր ծովում իրենց գործողություններն ուղղված են Գազայի հատվածում գտնվող պաղեստինցիների օգնությանը, և իրենք չեն խանգարում այդ տարածաշրջանի նավագնացությանը։