Գերմանիայի կառավարությունը որոշում է ընդունել արդիականացնել և շարք վերադարձնել TAURUS բոլոր հեռահար թևավոր հրթիռները, որոնք գտնվում են երկրի զինված ուժերի (Բունդեսվերի) սպառազինության մեջ: Այս մասին գրում է Die Welt թերթի կայքը՝ հավելելով, որ երեքշաբթի՝ մարտի 12-ին, Գերմանիայի պաշտպանության նախարարությունը համապատասխան պլանների մասին տեղեկացրել է Բունդեսթագի պրոֆիլային կոմիտեի արտահերթ նիստի գաղտնի մասի ընթացքում։

Պարբերականի տեղեկություններով՝ Գերմանիայի զինված ուժերի զինանոցում կա MBDA ընկերության արտադրության մոտ 600 TAURUS, ճշգրիտ թիվը գաղտնի է պահվում: Սակայն ներկա պահին դրանց միայն կեսն է համարվում աշխատունակ 2018 թվականին անցկացված տեխնիկական կատարելագործումից հետո, իսկ մյուսների մոտ լրացել է հավաստագրման ժամկետը։

Անսարք հրթիռները կուղարկվեն հիմնանորոգման այժմ բոլոր հրթիռները պետք է անցնեն ամբողջական ստուգում, իսկ նրանք, որոնց սերտիֆիկացման ժամկետը լրացել է, ուղարկվել են հիմնանորոգման։ Ինչպես ընդգծում Է Die Welt-ը՝ բոլոր TAURUS-ները շահագործման հանձնելու որոշումը նոր հնարավորություններ է բացում Բեռլինի կառավարության առջեւ. այն կկարողանա Ուկրաինային ավելի շատ թեւավոր հրթիռներ փոխանցել՝ չվտանգելով ազգային պաշտպանությունը: Ավելի հավանական է թվում նաև դաշնակիցների հետ այսպես կոչված շրջանաձև փոխանակումը։ Ըստ այդ տարբերակի, որին աջակցել է արտաքին գործերի նախարար Աննալենա Բերբոքը, Գերմանիան կարող է Taurus հրթիռները փոխանցել Մեծ Բրիտանիային, իսկ վերջինս, իր հերթին, Ուկրաինային կմատակարարի Storm Shadow հեռահար հրթիռների նոր խմբաքանակ:

Պաշտպանության նախարարությունը հրաժարվել է Die Welt-ի խնդրանքով մեկնաբանություն տալ այս հարցի վերաբերյալ: Բունդեսթագում մարտի 14-ին նոր քվեարկություն կանցկացվի Ուկրաինային Taurus թեւավոր հրթիռների մատակարարման հարցի շուրջ: Գերմանիայի կանցլեր Օլաֆ Շոլցը կտրականապես մերժում է Կիևին TAURUS հրթիռներ մատակարարելու գաղափարը՝ հիմնավորելով, որ եթե TAURUS-ը «սխալ կիրառվի», հրթիռը կարող է «թիրախ խոցել Մոսկվայի ինչ-որ տեղ»: