18+ ՏԵՍԱՆՅՈՒԹ․ 34 ուկրաինացիներ, որոնք փորձում էին սահմանն ապօրինի հատել, ծեծի են ենթարկվել և ձերբակալվել
Ուկրաինայի Չեռնովցիի շրջանում ձերբակալել են 34 տղամարդու տեղափոխող միկրոավտոբուս, որոնք փորձել են ապօրինի հատել Ռումինիայի հետ սահմանը: Այս մասին հայտնել Է Ուկրաինայի պետական սահմանապահ ծառայության մամուլի ծառայությունը։ Տեղեկությունը փոխանցում է РБК-ն։
Ուկրաինայի սահմանապահներն ու անվտանգության ծառայության աշխատակիցները «Порубное» անցակետի մոտ կանգնեցրել են միկրոավտոբուս, որի բեռնատար խցիկում 34 մարդ է եղել: Ձերբակալության ժամանակ սահմանախախտներն «իրենց հանդուգն են պահել եւ չեն կատարել սահմանապահների օրինական պահանջները», ուստի իրավապահները «ստիպված են եղել ֆիզիկական ներգործության միջոցներ կիրառել»:
Պարզվել է, որ միկրոավտոբուսի ուղևորները Ուկրաինայի քաղաքացիներ են, 12 տարբեր մարզերի 25-40 տարեկան բնակիչներ: Անցակետերը շրջանցելով Ռումինիա առաքելու համար ուղևորներից յուրաքանչյուրը վճարել է 10 հազար եվրո։
Միկրոավտոբուսը վարել է մի տղամարդ, որին ավելի վաղ կասկածում էին մարդկանց անօրինական տեղաշարժը կազմակերպելու մեջ։ Նա հաճախորդներին հավաքել է մեսենջերներից մեկի օգնությամբ։
Կազմակերպչին սպառնում է երեքից ինը տարվա ազատազրկում՝ քրեական օրենսգրքի 332-րդ հոդվածով (պետական սահմանով անձանց ապօրինի տեղափոխում): Մյուս ձերբակալվածների նկատմամբ կազմվել են վարչական վարույթներ։
Ավելի վաղ Ուկրաինայի Պետական սահմանապահ ծառայությունը հայտնել էր հինգ տղամարդու ձերբակալության մասին, որոնք ուղեւորվում էին դեպի Ուկրաինա-վրացական սահման: Նրանց ուղեկցում էր 15-ամյա մի պատանի, որը լավ էր կողմնորոշվում սահմանամերձ տեղանքում։ Սահմանապահ ծառայության տվյալներով՝ սահմանն ապօրինի հատելու հարցում օգնության համար տղամարդիկ կազմակերպչին վճարել են 3,5 հազարից մինչեւ 4 հազար դոլար:
Անչափահասին հանձնել են ծնողներին, իսկ ձերբակալվածների նկատմամբ վարչական արձանագրություններ են կազմել։ Սահմանն ապօրինի հատելու փորձի կազմակերպչին փնտրում են։
