Չինաստանը գործարկել է աշխարհում առաջին 4-րդ սերնդի ատոմային էլեկտրակայանը

Չինաստանը գործարկել է աշխարհում առաջին 4-րդ սերնդի ատոմային էլեկտրակայանը (ԱԷԿ): Այս մասին, ՏԱՍՍ-ի փոխանցմամբ, հայտնել է ՉԺՀ-ի էներգետիկայի պետական վարչությունը։

Շիդաուանի օբյեկտը՝ բարձր ջերմաստիճանով գազով հովացվող ռեակտորով, գտնվում է արևելյան Շանդուն նահանգում։ Ինչպես նշվում է, ատոմակայանը փորձնական ռեժիմով շարունակաբար աշխատել է 168 ժամ և պաշտոնապես հանձնվել կոմերցիոն շահագործման։

«Սա վկայում է այն մասին, որ Չինաստանը չորրորդ սերնդի միջուկային էներգիայի տեխնոլոգիաների հետազոտման, մշակման և կիրառման ոլորտում հասել է աշխարհի կտրվածքով առաջատար մակարդակին», - ասվում է գերատեսչության կայքում հրապարակված հայտարարության մեջ։

Այն պարզաբանում է, որ բարձր ջերմաստիճանով գազով հովացվող ռեակտորի ամենանշանակալի առավելությունը դրա անվտանգությունն է էլեկտրաէներգիայի արտադրության ոլորտում, և, հետևաբար, նման ատոմակայանները լայն հեռանկարներ ունեն։