ԱԱԾ-ն հարցաքննության է տարել նախկին պաշտոնյաների կանանց․ «Ժողովուրդ»
ԱԱԾ-ն մտել է Երևանի մի քանի մանկապարտեզներ ու տնօրեններին հարցաքննության տարել։ Այս մասին գրում է «Ժողովուրդ» օրաթերթը և նշում, որ հարցաքննված տնօրենների մեջ եղել են նաև նախկին պաշտոնյաների կանայք։
Օրաթերթի տեղեկություններով՝ քննությունը ցույց կտա՝ նրանք կկալանավորվեն առաջիկայում, թե ոչ։
Հիշեցնենք, որ նոյեմբերի 27-ին ԱԱԾ-ն հաղորդագրություն տարածեց, որ 5 անձ կալանավորվել է տարբեր մանկապարտեզներում սնունդ մատակարարելիս առանձնապես խոշոր չափի հափշտակություն կատարելու համար։
Պարզվել է, որ պետական գնումների մրցույթներում հաղթող ճանաչված և սննդի մատակարարմամբ զբաղվող «ՀԱՅԿԱԶՈւՆՔ» և «ՖՈՏՈՆ» ՍՊԸ–ների սեփականատերերը 7 անձի, այդ թվում` ընկերության աշխատակիցների մասնակցությամբ, Երևանի քաղաքապետարանի ենթակայությամբ գործող տարբեր մանկապարտեզների պատասխանատու անձանց հետ կեղծ փաստաթղթեր են կազմել։
Ըստ ԱԱԾ-ի՝ 2023 թվականի փետրվարից նոյեմբեր ամիսների ընթացքում փոխանցման եղանակով ստացել և խաբեության եղանակով հափշտակել են փաստացի չմատակարարված ապրանքների խմբաքանակների դիմաց վճարված՝ առանձնապես խոշոր չափերով գումարները:
