Ֆրանսիան Հայաստանին վաճառել է ոչ պիտանի մի բան, որը չի կարողացել իրացնել այլ ուղղություններում․ Զախարովա

Ուկրաինայում ֆրանսիական «Բաստիոն» զրահամեքենաները բավականին ցածր արդյունավետություն են ցուցաբերել իրական մարտական գործողությունների պայմաններում։ Այս մասին ճեպազրույցի ժամանակ հայտարարեց ՌԴ ԱԳՆ պաշտոնական ներկայացուցիչ Մարիա Զախարովան՝ ի պատասխան լրագրողի հարցին, որը վերաբերում էր Անվտանգության խորհրդի քարտուղար Արմեն Գրիգորյանի հայտարարությանը, թե ՀՀ իշխանություններին լիովին բավարարում է Ֆրանսիայի մատակարարած սպառազինությունը։

Զախարովան կարծում է՝ միամտություն է ֆրանսիական զրահամեքենաների վրա, այսպես ասած, հույսը դնելը։ 

«Եթե պարզապես հրապարակներում ցուցադրելու համար է, միգուցե իմաստ կա, բայց եթե արդյունավետության մասին խոսենք, կարող են գալ, մեր զինվորականները պատմել։ Պարզապես Ֆրանսիան Հայաստանին վաճառել է ոչ պիտանի մի բան, որը Փարիզը չի կարողացել իրացնել այլ ուղղություններում»,- ընդգծել է Զախարովան։ 

Զախարովայի խոսքով՝ առեղծված է, թե ինչպես կարող է դա նպաստել Հայաստանի սուվերեն տարածքի պաշտպանությանը։