ԲՀԿ-ն՝ Ծառուկյանի ունեցվածքի վերաբերյալ «Հանրային»-ով հեռարձակված տեսանյութի մասին
«Բարգավաճ Հայաստան» կուսակցության աշխատակազմի ղեկավար Իվետա Տոնոյանն իր ֆեյսբուքյան անդրադարձել է կուսակցության նախագահ Գագիկ Ծառուկյանի ունեցվածքի բռնագանձման մասին Դատախազության որոշմանը։
«Ի պատասխան երեկ Հանրային Հեռուստատեսությամբ եթեր հեռարձակված և հետագայում մի քանի այլ լրատվամիջոցներով տարածված տեսանյութի վերաբերյալ տարբեր ԶԼՄ-ների հարցումների՝ կարող եմ նշել, որ վերոնշյալ տեսանյութը բացառապես հանրային ապակողմնորոշման ժանրից էր և ոչ ավելին:
Ապօրինի ծագում ունեցող գույքի բռնագանձման գործի վերաբերյալ առիթ ունեցել եմ ասելու, որ կա օրենք, կա իրավական գործընթաց, կա փաստաբանական խումբ, կա բոլոր հարցերին սպառիչ պատասխաններ տալու պատրաստակամություն: Եվ այս պայմաններում նման տեսանյութի պատրաստումն ու տարածումը բացառապես հանրության ուշադրությունը շեղելու մի ձև է ընդամենը: Զարմանալի զուգադիպությամբ հանրության ուշադրության շեղմանն ուղղված նմանատիպ սյուժեները պատրաստվում են հենց մեր երկրի իրական բարդ օրակարգի և ռիսկերի ահագնացման փուլում:
Ի դեպ, նույն սյուժեում կա մի ձևակերպում, ըստ որի, Գագիկ Ծառուկյանը գործարարությամբ սկսել է զբաղվել 80-ական թվականներին: Միայն այս միտքը բավական է տեսանյութում հնչեցված մյուս փաստարկների արժանահավատությունը կասկածի տակ դնելու համար: Ինչ վերաբերում է գործի ընթացքին, ապա փաստաբանական խումբը զբաղվում է նյութերի ուսումնասիրմամբ և եթե հարկ լինի՝ նաև արտերկրից հրավիրված հեղինակավոր իրավաբաններ կներգրավվեն գործընթացում»,- նշվում է գրառման մեջ։
Հիշեցնենք, որ Դատախազությունը վիճարկում է «Բարգավաճ Հայաստան» կուսակցության նախագահ Գագիկ Ծառուկյանի ունեցվածքի օրինականությունը: Հակակոռուպցիոն դատարանը Ծառուկյանի, նրա ընտանիքի անդամների և փոխկապակցված մյուս 4 անձանց վերաբերյալ ապօրինի գույքի բռնագանձման հայցն ընդունել է վարույթ: Հօգուտ պետության դատախազությունը պահանջում է բռնագանձել միլիարդավոր դրամներ, հարյուրից ավելի շարժական ու անշարժ գույք, նաև 39 ընկերությունների բաժնեմասեր և բաժնետոմսեր:
