Զախարովան համեմատել է Բորելի հոդվածն էրոտիկ ֆիլմի հետ

Ռուսաստանի ԱԳՆ պաշտոնական ներկայացուցիչ Մարիա Զախարովան կապ է գտել 1970-ականների էրոտիկ ֆիլմերիի եւ Ուկրաինայի մասին Եվրոպական միության արտաքին հարաբերությունների և անվտանգության հարցերով բարձր ներկայացուցիչ Ժոզեպ Բորելի նոր հոդվածի միջեւ, որը կոչվում է «In The Eye of the Hurricane» («Փոթորկի կենտրոնում»): Զախարովան այս մասին գրել է իր Telegram-ալիքում։ Տեղեկությունը փոխանցում է gazeta.ru-ն։ 

«Բանն այն է, որ «In The Eye of the Hurricane»- ը 70-ականների էրոտիկ «El ojo del huracán» ֆիլմի անգլերեն անվանումն է, որը նկարահանվել է Իսպանիայում՝ Բորելի հայրենիքում (իսպանա-իտալական համատեղ արտադրություն)»,- գրել Է Զախարովան։ 

Այնուհետև արտաքին քաղաքական գերատեսչության ներկայացուցիչը հակիրճ պատմել է Ֆիլմի սյուժեն, որը կայանում է նրանում, որ աղջիկը որոշել է բաժանվել հոգատար ամուսնուց կրքոտ սիրեկանի պատճառով: Դրանից հետո նա հայտնվում է տարբեր խնդիրների մեջ և ենթարկվում բռնաբարությունների։ 

«Թվում է, թե ինչ կապ ունի Ուկրաինան այստեղ»,- վերջում հռետորական հարց է տալիս Զախարովան։ 

Նշենք, որ Բորելի հոդվածում եվրոդիպլոմատիայի ղեկավարը պատմում է, որ Եվրամիությունը լուրջ մարտահրավերի է բախվել՝ կապված Ուկրաինային աջակցելու և միաժամանակ Մերձավոր Արևելքում հակամարտությունը կարգավորելու անհրաժեշտության հետ։  Բորելը կարծում է, որ ԵՄ-ն պետք է շարունակի օգնություն ցուցաբերել Կիևին այնքան, որքան անհրաժեշտ կլինի։