ՀՀ ընդդիմությունը դիմել էր Մոսկվային՝ Փաշինյանի դեմ պայքարում աջակցության համար․ Զատուլին
Հայաստանի ընդդիմությունը ժամանակին դիմել է Մոսկվային՝ Նիկոլ Փաշինյանի դեմ պայքարում աջակցություն ստանալու համար։ Այս մասին հայտարարել է ՌԴ պետդումայի պատգամավոր Կոնստանտին Զատուլինը «Խոսում է Մոսկվան» ռադիոկայանի եթերում։
Զատուլինը, մասնավորապես, նշել է, որ այն բանից հետո, երբ Նիկոլ Փաշինյանը որոշեց 2021թվականին արտահերթ խորհրդարանական ընտրություններ անցկացնել, ընդդիմությունը դիմել է Ռուսաստանին և խնդրել ինչ-որ կերպ տեսանելիորեն աջակցել իրենց, սակայն ռուսական կողմը հրաժարվել է՝ պատճառաբանելով, որ եթե հայկական ընդդիմությունը գա իշխանության, կարող է հրաժարվել 2020 թվականի նոյեմբերի 9-ի եռակողմ հայտարարությունից։
«Մոսկվան կարծում էր՝ փաստաթղթից հրաժարվելը կարող է նոր պատերազմ հրահրել, չէր ցանկանա խառնվել դրա մեջ։ Մենք ասացինք՝ ոչ մի կերպ։ Եթե Փաշինյանը ստորագրել է 2020թ․ նոյեմբերի 9-ին Ղարաբաղում պատերազմի ավարտի այս հայտարարությունը։ Եթե նա պաշտոնանկ արվի, նորից ռազմական գործողություններ կսկսվեն, մենք կներգրավվենք, մեզ կներքաշեն, իսկ մենք չենք ուզում, մենք մեր գործերն ունենք․ այնպես որ, ձեռք մի տվեք նրան», - մանրամասնել է Զատուլինը։
Զատուլինն անդրադարձել է նաև ՀԱՊԿ-ին։
Նրա խոսքով՝ երբ 2022-ի սեպտեմբերին Ադրբեջանը ներթափանցեց Հայաստանի խորքը, ՀԱՊԿ-ը պետք է անհապաղ արձագանքեր, սակայն դա տեղի չունեցավ, ինչից էլ օգտվեց ՀՀ վարչապետ Նիկոլ Փաշինյանը:
«Ինչ վերաբերում է ՀԱՊԿ-ին, ապա ՀԱՊԿ-ը նույնպես սխալ վարվեց 2022 թվականի սեպտեմբերին, երբ Ադրբեջանը սկսեց խորանալ դեպի Հայաստանի խորքը։ Դա իսկապես տեղի է ունեցել։ Պետք էր անհապաղ արձագանքել, առնվազն կոչ անել, հրապարակային հայտարարել և այլն։ Սկսեցինք արձագանքելու ուշացումներ ունենալ։ Ու սրանից օգտվեց Փաշինյանը։ Նա շատ ճարպիկ մանիպուլյացիա է անում, նա մանիպուլյատոր է։ Սա միակ բանն է, որ նա գիտի, թե ինչպես անել և անում է դա։ Եվ պետք է ասել, որ Ռուսաստանի նկատմամբ վստահության մակարդակը, իհարկե, նվազում է հենց Հայաստանում՝ կապված այն բանի հետ, որ առավոտից երեկո նրանց ուղեղները լվանում են համացանցում, հեռուստատեսությամբ և այլն։ Եվ մենք պետք է պայքարենք դրա դեմ»,- մանրամասնել է Զատուլինը:
