Թուրքիայի խորհրդարանի հանձնաժողովը հետաձգել է ՆԱՏՕ-ին անդամակցելու Շվեդիայի հայտի քվեարկությունը
Թուրքիայի խորհրդարանի արտաքին հարաբերությունների հանձնաժողովը հինգշաբթի հետաձգել է ՆԱՏՕ-ին անդամակցելու Շվեդիայի հայտի քվեարկությունը։ Այս մասին հայտնում են արևմտյան լրատվամիջոցները՝ հղում անելով կոմիտեի նախագահ Ֆուաթ Օքթային, գրում է Интерфакс–ը:
«Մեր բոլոր օրենսդիրները Շվեդիայի անդամակցությանը ՆԱՏՕ-ին հավանության տալու համար պետք է լիովին վստահ լինեն դրանում: Մենք ամեն ինչ կքննարկենք այս հարցով հանձնաժողովի հաջորդ նիստում», - մի քանի ժամ տևած բանավեճից հետո ասել է Օքթայը:
Նա հավելել է, որ Շվեդիայի խնդրանքով օրինագիծը կարող է վերադարձվել օրակարգ՝ հաջորդ շաբաթ քննարկելու համար, սակայն հստակ ժամկետ չի նշել։ Օքթայը նշել է, որ անհրաժեշտության դեպքում Շվեդիայի դեսպանը կարող է հրավիրվել կոմիտե՝ մի շարք հարցեր պարզաբանելու համար։
Հինգշաբթի ավելի վաղ հաղորդվել էր, որ Թուրքիայի խորհրդարանի արտաքին հարաբերությունների հանձնաժողովի անդամները սկսել են քննարկել ՆԱՏՕ-ին Շվեդիայի անդամակցության հարցը։ Հանձնաժողովը կարող է օրինագծերը հաստատել ձայների պարզ մեծամասնությամբ։ Ընթացակարգի համաձայն՝ դաշինքին Շվեդիայի միանալու մասին արձանագրությունը նախ պետք է հաստատի հանձնաժողովը, ապա հարցը կքննարկի ամբողջ Թուրքիայի Ազգային մեծ ժողովը։ Սրանից հետո փաստաթուղթը պետք է ստորագրի երկրի նախագահ Ռեջեփ Թայիփ Էրդողանը։
ՆԱՏՕ-ի գլխավոր քարտուղար Յենս Ստոլտենբերգը դաշինքի երկրներին ասել է, որ Շվեդիան պետք է ընդունվի դաշինքի մեջ ոչ ուշ, քան նոյեմբերի 28-29-ը կայանալիք կազմակերպության արտգործնախարարների հանդիպումը։ Հոկտեմբերի վերջին Էրդողանը Թուրքիայի խորհրդարանին է ներկայացրել ՆԱՏՕ-ին Շվեդիայի անդամակցության վավերացման փաստաթղթերի փաթեթ։ Սակայն Հունգարիան դեռ չի ավարտել վավերացման ընթացակարգը։
Շվեդիան ՆԱՏՕ-ին անդամակցելու հայտ է ներկայացրել 2022 թվականին։ Թուրքիան, որպես դաշինքի անդամ, դրեց պայմաններ, որոնք պետք է կատարեր Ստոկհոլմը, որ Անկարան վավերացնի մուտքը։ Այսպիսով, Թուրքիան պահանջել է քրդական կազմակերպություններին ահաբեկչական ճանաչել, Թուրքիայի կողմից ահաբեկչության մեջ մեղադրվող անձանց արտահանձնել, Անկարային զենք մատակարարելու արգելքները վերացնել։
