Եթե որևէ այլ երկիր աներ այն, ինչ հիմա անում է Իսրայելը, նրա նկատմամբ պատժամիջոցներ կկիրառվեին. Հորդանանի փոխվարչապետ
Հորդանանը զերծ կմնա Իսրայելի հետ «ջուր՝ էլեկտրաէներգիայի դիմաց» նախագծի իրականացումից, որը մշակվել է կլիմայի փոփոխության դեմ պայքարում տարածաշրջանային համագործակցության շրջանակներում։ Այս մասին Al Jazeera հեռուստաալիքին տված հարցազրույցում հայտարարել է Հորդանանի փոխվարչապետ, արտաքին գործերի նախարար Այման աս-Սաֆադին։
«Հորդանանը չի ստորագրի համաձայնագրեր Իսրայելի հետ էներգիայի և ջրի փոխանակման վերաբերյալ», - ասել է նա,– «Մենք կանենք ամեն ինչ, որը, մեր կարծիքով, կօգնի աջակցել պաղեստինյան ժողովրդին»:
Փոխվարչապետը կարծում է, որ Գազայի հատվածում Իսրայելի գործողությունները ռազմական հանցագործություններ են և չեն կարող դիտվել որպես ինքնապաշտպանություն։
«Եթե որևէ այլ երկիր աներ այն, ինչ հիմա անում է Իսրայելը, նրա նկատմամբ պատժամիջոցներ կկիրառվեին»,- ընդգծել է նա,– «Աշխարհը պետք է ընդունի, որ Իսրայելը ոչնչացրել է այն, ինչ արվել է տասնամյակներ շարունակ Մերձավոր Արևելքում խաղաղության մթնոլորտ ստեղծելու համար և ամբողջ տարածաշրջանը հրում է դեպի դժոխք», - ասել է Աս-Սաֆադին:
