Հեղուկ գազի գինը բարձրացել է, որակը՝ ընկել, նախկինը չէ. «Ժողովուրդ»
Բենզինի աճող գնին զուգահեռ՝ հեղուկ գազի գներն էլ են բարձրանում: «Ժողովուրդ» օրաթերթը գրում է, որ բազմաթիվ վարորդներ մտահոգ են, որ ոչ միայն հեղուկ գազի գինն է բարձրացել, այլ նաեւ որակն է ընկել, նախկինը չէ:
«Պարզվում է, որ հեղուկ գազի կալորիականությունը 25%-ով նվազել է: Եթե նախկինում հնարավոր էր 5000 դրամի լցնել 25 լիտր հեղուկ գազ եւ երեւանյան փողոցներով վարել մոտ 200 կմ 2-2.5լ/աշխատանքային շարժիչի դեպքում, այսօր արդեն նույն 25 լիտրով նույն 2-2.5լ/աշխատանքային շարժիչի դեպքում նույն երեւանյան փողոցներով հնարավոր է լինում վարել 145-150 կմ, այդ էլ՝ այն դեպքում, որ հետազոտություն անցած մեքենաները չունեն որեւէ խնդիր, ըստ այդմ՝ վառելիքի կորուստ»,– գրել է օրաթերթը:
Նշվում է, որ գների բարձրացմանը զուգահեռ՝ նվազում է նաև կալորիականությունը՝ վնասելով միջին վիճակագրական և դրանից էլ նույնիսկ ցածր աշխատավարձ ստացող վարորդի վճարունակությանը:
Մանրամասները՝ թերթի այսօրվա համարում:
